هاني رمزي: اتظلمت كتير وكنت بكلم ربنا والدموع نازلة بحرقة

كشف الفنان هاني رمزي تفاصيل تعرضه للظلم، وافتراءات طالت سمعته، في المرحلة التي أعقبت ثورة يناير.

قال هاني رمزي عبر تصريحات إذاعية: «اتظلمت كتير بجد.. في فترة قيل عني كلام كتير جدًا، وكنت بسأل نفسي: يا رب ليه؟، فيه ناس سمعة هاني رمزي بتعملهم ارتكاريا لأسباب في نفوسهم الضعيفة».

تفاصيل تعرض هاني رمزي للظلم

وتابع: «في لحظة الظلم دي ملقيتش حد وقف جنبي.. افتراءات ولجان إلكترونية وناس ربنا عمى عينيها بالشر، وأنا أصلاً عايش في حالي ومهنتي إني أسعد الناس».

واستكمل هاني رمزي: «الموجة كانت عالية جدًا، ومكنتش عارف أدافع عن نفسي، ومطلبتش من حد كلمة حق رغم علاقاتي وصداقاتي.. لقيت كله خايف يتكلم عشان أكل عيشه، خاصةً الفترة اللي بعد ثورة يناير وكلمت ربنا والدموع نازلة بحرقة في أوضتي.. قولتله: يارب أنت حاسس وعارف ومفيش حد واقف جنبي، كله خايف.. أنا اعتمادي كله عليك أنت، صوتي يوصل إزاي؟».

تصريحات هاني رمزي

واختتم: «لقيت بعدها تليفون من برنامج في قناة القاهرة والناس عايزين يستضيفوني عشان الكلام اللي على السوشيال ميديا.. حسيت إن دي إشارة واستجابة من ربنا عشان أرد.. بعدما رديت الدنيا بقت كويسة والناس بدأت تتكلم، وعذرت الناس وسامحت اللي أساء ليا لأن ربنا نصرني».