هشام ماجد: شوفت ناس بتتجنن من الشهرة وحصلي «تروما» بعد وفاة والدي

تحدث الفنان هشام ماجد عن موقفه من الغرور، معلقًا على إصابة البعض بالغرور بعد حدوث نقلة نجاح في حياته.

قال هشام ماجد عبر تصريحات تلفزيونية له: «أنا مش مغرور الحمدلله، ومتأكد جدًا إني مش مغرور، بس فيه ناس بتتغر وتتغير بعد الشهرة، والشهرة بتجنن، إنك تبقى محدش يعرفك وتعمل عمل يدغدغ الدنيا، وتلاقي كل الناس بتتكلم عليك».

تصريحات الفنان هشام ماجد

واستكمل: «أو يبقى مش معاك فلوس وتلاقي فجأة الناس بتعرض عليك فلوس كتير، ودي نقلة في الحياة تجننك.. شوفت ناس بتتجنن من الشهرة علشان مش سوية، والخضة دي بتخليه يتجنن، ومبحترمش المغرور، علشان بين يوم وليلة ربنا إداله نعمة زيادة، فتنسى الناس وتنسى صحابك، ومحدش عمل معايا كده لأن محدش يقدر يتكبر أو يشوف نفسه عليّ، ومش مشاهير بس فيه ناس عادية بتتغير، وإن شاء الله مش هتغير».

وعلق هشام ماجد على قلة ظهوره بالبرامج التلفزيونية أو برامج الهارد توك شو، قائلًا: «مبطلعش في برامج من نوعية الاستجواب، وقاصد الاختفاء لأني مش محتاج حد يعرف عن حياتي الشخصية حاجة، لأني ببيع للجمهور فن، لكن ملوش دعوة بعيلتي، ودي حاجات شخصية متتفتحش غير لناس قريبة».

هشام ماجد

أسرار هشام ماجد

وتحدث عن نفسه قائلًا: «خريج كلية هندسة، وأسرتي متوسطة مستورة، ووالدي كان دكتور وتوفى وأنا 13 سنة ووالدتي مدرسة، وإخواتي شيرين أكبر مني بسنة ومحمود أصغر مني بـ 8 سنين، وبعد وفاة والدي ابتدت الدنيا تقل شوية، لكن والدتي عمرها ما حسستنا إننا ناقصنا حاجة، ووفاة والدي أثرت في حياتي لأنه كان قريب مني وأنا كنت في سن صغير، وده حصلنا كلنا، من الناحية المادية والنفسية برضو».

وأضاف هشام ماجد حديثه عن والده، قائلًا: «اللي يعرف والدي كان يقولي إنه زملكاوي ووسيم وأخف دم في العالم، وكان بياخدني معاه ماتشات كورة وحببني في الزمالك».

واختتم: «كان تعبان فترة طويلة وفي يوم بلغونا إنه توفى، وحصلي تروما لأن الموضوع حصل فجأة، ودي نقطة تحول في حياتي لأن شكل حياتنا اتغير، ووالدتي بقى عليها حمل كبير».

هشام ماجد

هشام ماجد