وائل جمعة يوجه رسائل نارية للاعبي الأهلي بعد التعادل مع بتروجت

وجه وائل جمعة، نجم الأهلي السابق، رسالة شديدة اللهجة إلى لاعبي الفريق، عقب التعادل مع بتروجت ضمن منافسات الدوري الممتاز.

وقال جمعة عبر حسابه الرسمي على موقع التواصل الاجتماعي "إكس":" كلمتين للاعبي الأهلي.. بقالي فترة متكلمتش عن الأهلي، لكن اللي بشوفه دلوقتي لازم نتكلم عنه من حبنا للنادي، ولازم الرسالة دي توصل للاعبين لو غايبة عنهم، وأنا هتكلم بلسان المشجع".

وأضاف:" إحنا بنحب الأهلي وهيفضل حبنا ليه دايم، بس أوعى تفتكر إن الجمهور هيحبك على حساب النادي، لأنك كلاعب بتبني رصيدك من تضحيتك والمحافظة على بيتك اللي هو بيت المشجع".

وتابع جمعة:" المشجع الأهلاوي عايز يشوفك بتحارب علشان بيتك، وعلشان انتصاره، وإن اسمه يفضل مرفوع دايمًا. أتمنى كل واحد فيكم يحاسب نفسه على اللي قدمه في الفترة اللي فاتت، مدربين كتير جم ومشيوا في الفترة الأخيرة، وده مش من عادة الأهلي".

وأوضح نجم الأهلي السابق:" إحنا مرينا بالفترة دي قبل كده، ومش معنى إن النادي بيغيّر المدرب إنكم بعيدين عن المسؤولية. لازم نبص في المراية ونحاسب نفسنا. محتاجين نشوف رد فعل مختلف منكم، والجمهور دايمًا وراكم طول ما أنتم بترفعوا علم الأهلي وتفرحوا شعبه".

وكان الأهلي قد تعادل مع بتروجت بهدف لمثله ضمن منافسات الجولة الثانية عشرة من الدوري الممتاز، ليرفع رصيده إلى 22 نقطة في المركز الثاني، خلف سيراميكا كليوباترا المتصدر برصيد 23 نقطة.