ياسمين عز للسيدات بأسبوع العيد: «كثفي حملات التنضيف واشتري 2 كيلو ممبار»

وجهت الفنانة ياسمين عز، رسالة للسيدات لأسبوع العيد، مؤكدة أنه أسبوع لراحة زوجك، وفي حاجة لهدوء:«بلاش تستخدمي الرقاق الجاهز واستخدمي الفلاحي».

وقالت ياسمين عز في تصريحات تليفزيونية: «خلاص بدأنا أسبوع العيد وعيد سعيد عليكي يا مدام وعلى فرعونك، وأسبوع الأجازة مش عشانك ده عشان جوزك حبيبك، يرتاح فيه من تعب الشغل، انتي مريحة طول السنة وخدتي أجازة

في العيد الصغير، نبدل بقى وتعالي على نفسك اليومين دول شوية وصدقيني مردودهم عليكي هيكون هايل».

وتابعت ياسمين رسالتها للسيدات: «كثفي من حملات التنضيف في البيت والترويق، عشان لما يقعد إجازة يلاقي البيت فلة وشمعة ودي عادة عندنا ف الأعياد نخليه أحسن ما يكون، ولو عندك وقت فراغ انزلي واشتري اتنين كيلو

ممبار واحشيهم وشيليهم في الفريزر علشان تطلعيهم في العيد وتحمريهم لجوزك».

وأوضحت: «بحذرك من حاجة وهي انتي وقرودك الصغيرين يكون في دوشة، والراجل عايز هدوء وفيه كم كبير من الخناقات والمشاكل اللي حصلت بسبب الموضوع ده، وموضوع الأكل، بيبقى عايز ياكل فتقعد 4 ساعات لحد ما تجيبله الممبار، لحد ما يكون اتخنق وجاله هبوط حاد في الدورة الدموية او اتخنق ونزل من البيت، فحضري من بدري ومش عايزين مشاكل».

وأضافت ياسمين عز: «ابقي استخدمي الرقاق الفلاحي البلدي بلاش الرقاق الجاهز بتاع اليومين دول، وهتحسي بالفرق وهتدعيلي، والفرق بينه الرقاق البلدي لما تسقيه شربة مش هيبوش أما التاني بيبوش».

ياسمين عز

ياسمين عز

ياسمين عز