أحد أبطال حرب أكتوبر: دخلنا الحرب بعقيدة «يا النصر يا الشهادة» واستولينا على خط بارليف في 6 ساعات

كشف الجندي البطل محمد طه يعقوب، أحد أبطال حرب أكتوبر،  كواليس الاستعداد لحرب أكتوبر 1973، وكيف نجح الجيش المصري في خداع العدو، مؤكدا أن المقاتلين دخلوا المعركة بعقيدة «يا النصر يا الشهادة»، واستطاعوا عبور الساتر الترابي والاستيلاء على خط بارليف في 6 ساعات.

وقال الجندي البطل محمد طه يعقوب خلال لقائه مع الإعلامية «نهال طايل» في برنامج «تفاصيل» المذاع على قناة «صدى البلد2»: «كلنا مقاتلين كنا في المعركة وكلنا أبطال كل واحد كان ليه دور وقام بالمهمة بتاعته على أكمل وجه، فمن الطبيعي إن الرتب طبعا لما بنيجي ندخل المعارك، مفيش حاجة اسمها بنعلق رتب على الأكتاف بتتشال عشان لما ندخل المعارك لو في حالة أسر ميعرفوش مين القائد وده ما حصلش طبعا، إحنا لبسناهم البيجامات».

وأوضح: «الحرب كلها كانت خدعة، هو بيبقى فيه إحساس من قبلها بعملية التدريبات، يعني كنا بنتدرب مثلا على قوارب مطاطية في بعض البحيرات».

وأوضح: «كل سنة الرئيس السادات كان يقول: 'السنة دي سنة الحسم'، وبعدين نلاقي السنة كلها عدت مفيش حرب، كل ده طبعا كان خداع استراتيجي بالنسبة للعدو، لغاية لما العدو قال: إن خلاص مصر مش هتحارب، وبعدين يقولوا: لا يمكن يحاربوا في رمضان».

وتابع: «الحروب دايما بتبدأ في أول ضوء وفي آخر ضوء، المعارك كلها على مستوى العالم، لكن حرب تبدأ الساعة الساعة 2 الظهر، فطبعا دي كانت معجزة، وقدرنا نعدي الساتر الترابي ونستولى على خط بارليف في 6 ساعات، وإسرائيل ما كانتش متوقعة إن فيه جيش هيحارب الساعة 2 وهو صايم، وجاتلنا الأوامر إن إحنا نفطر».