أحمد العوضي يعلق على جدل إيرادات الأفلام: أرقام غير منطقية وكلامي مش موجّه لمحمد إمام

علق الفنان أحمد العوضي على أزمة الإيرادات، وجدل المنافسة بينه وبين الفنان محمد إمام، الذي ينافس بفيلم صقر وكناريا.

قال أحمد العوضي عبر تصريحات تلفزيونية: «الحمدلله متصدرين الإيرادات بشكر ربنا وبشكر الشركة المنتجة وشريكتي في الفيلم مي عمر وإخواتي اللي بدعمهم بعد دعم ربنا الحمدلله إحنا في حتة حلوة».

وتابع: «إحنا بننزل الأرقام الحقيقية، أعمل 15 مليون في أول أسبوع ليه بعمل بوجي وطمطم؟ محمد إمام أخويا وزميلي ونجم كبير وأنا بحترمه جدًا وإحنا أصدقاء وأنا باركت له على الفيلم».

واستكمل أحمد العوضي: «والكلام مش موجه ليه أصلا عشان محدش يتخيل إن في بيننا صراع أو عداوة زي ما كانوا متخيلين كده في رمضان إحنا بينا منافسة شريفة».

وأضاف: «أنا كلامي موجهه للجهة اللي بتطلع الأرقام دي أنهم يقولوا جابوا يوم ماتش مصر والأرجنتين 6 مليون، جبتهم إزاي يا صاحبي دا إيراد العيد، الناس كلها بتعيد وتنفخ البلالين وتصرف فلوسها في السينما، لكن يوم ماتش مصر والأرجنتين الناس كلها قاعدة بتشوف ميسي والظلم التحكيمي وأنت بتجيب 6 مليون جنيه».

واختتم أحمد العوضي: «الطبيعي أنك في أول أسبوع بتجيب إيراد عالي وبعدها ينزل مش منطقي بعد ما الفيلم اللي بعدي ينزل أجيب 20 مليون ومحمد إمام بينزل الإيرادات اللي بتجيله وأنا بحترمه جدًا أنا برد على البوست اللي بيجيله لأنه مش منطقي».