أحمد مالك يكشف أسرار طفولته: كنت بحس بخذلان من شكلي

كشف الفنان أحمد مالك أسرار عن طفولته وتعرضه للتنمر، بجانب بدايات مسيرته الفنية منذ أن كان عمره 8 سنوات.

قال أحمد مالك عبر تصريحات إعلامية: «بدأت الشغلانة دي وأنا صغير، أول مرة وقفت قدام الكاميرا كان عندي 8 سنين وكنت بعمل إعلان مكرونة والمكرونة كانت نية علشان شكلها يبقى حلو».

بدايات أحمد مالك الفنية

وأضاف: «كنت باكلها وعايز أرجع ولكن مينفعش علشان الناس بتزعق، المفروض التجربة دي لطفل مش حلوة ولكن أنا كنت مبسوط زي يوسف عثمان في فيلم بحب السيما وكنت بدخل اللوكيشن وأنا طفل عندي 9 سنين كنت بحس أنه شيء بيكسر كل الواقع اللي كنت عايش فيه».

واستكمل الفنان أحمد مالك حديثه: «كنت بشعر بالأمان في اللوكيشن وأنا عندي 13 سنة، أنا عندي الجوع بتاع أني معملتش حاجة، مع أني عملت كتير وأنا مش عارف أنا عملت إيه مع أني الحمد لله اشتغلت كتير وعملت حاجات كويسة وممتن للمهنة جدًا ورؤيتي لنفسي وذاتي مرتبطة أوي برؤيتي لمهنتي».

تصريحات أحمد مالك

وتابع: «التمثيل اختارني من وأنا صغير جدًا وخلاص القدر اختار ده فأنا جزء من ده، وقررت إني هوهب حياتي والمعنى بتاعي هو الفن، ولو هختار حاجة غير التمثيل هتبقى الكتابة».

وفيما يخص طفولته، قال الفنان أحمد مالك: «كنت طفل فضولي جدًا، وأنا صغير مكنش عندي ثقة في نفسي وده بينعكس دلوقتي».

واختتم: «كنت دايمًا بحس إني مش قوي بدنيًا وبحس بخذلان من هيئتي وشكلي، وتعرضت للتنمر في مراهقتي المبكرة وكنت بتكسف جدًا وطول الوقت عايز استخبى».

أحمد مالك