أحمد موسى: أمن مصر القومي خط أحمر.. والقوات المسلحة تتحرك لحماية الثروات والحدود

قال الإعلامي أحمد موسى إن الدولة المصرية تتحرك بكل حسم لحماية أمنها القومي وثرواتها الطبيعية، مؤكدًا أن القوات المسلحة المصرية مسؤولة عن تأمين الحدود وحماية مقدرات الشعب، وأن أي معلومات متداولة يجب الرجوع فيها إلى المصادر الرسمية فقط.

وأضاف الإعلامي أحمد موسى خلال برنامج 'على مسئوليتي' المذاع على قناة 'صدى البلد': 'في اليومين اللي فاتوا شوفنا حاجات متداولة على مواقع التواصل، النهارده القوات المسلحة بتقول الحكاية بالظبط، وناخد بالنا من الفيديوهات اللي بيتم نشرها، وأي أمور خاصة بالقوات المسلحة والشرطة لازم ناخدها من مصدرها، مينفعش حاجة متعلقة بالأمن القومي المصري نمشي ورا عناصر إجرامية'.

وأوضح: 'الحكاية أن أمن مصر، محدش ييجي ناحيته على أي اتجاه من أي مكان، والرئيس السيسي قال أمننا القومي وحدودنا بالكامل خط أحمر'.

وتابع: 'اللي هيقرب هيتعمل معاه اللازم، وهتشوفوا، العصابات الإجرامية بدأت تدخل في أماكن ناحية مرسى علم ويعملوا عمليات تنقيب وحفر وأجهزة حديثة، هي الثروات دي بتاعة مين؟ بتاعة الشعب المصري، ودور الدولة تحمي ثرواتها في كل مكان، في البحر والبر وفي أي حتة'.

وأشار: 'لو فيه جرام ذهب أو أي معدن ده ثروة قومية لازم تتحمي، وبدأت هذه العصابات الإجرامية تعمل مشاكل مع بعض وتضرب بعض، وكل واحد يقول المنطقة دي بتاعتي، فاكرين إننا هنسيب الموضوع كده؟ وأي حد هيدخل البلد متسلل مش هنسيبه'.

استكمل: 'مصر بتقوم بمسؤوليتها وجيشها مسؤول عن تأمين حدودها بالكامل، وأي حد هيقوم بأعمال غير شرعية هتواجه بالقانون، والدولة تحركت عشان تواجه العصابات الإجرامية المتواجدة داخل الأراضي المصرية'.

استطرد: 'وأي حد يقول إن مصر بتعمل كده، مصر لازم تعمل كده، وده فرض عين لحماية ثرواتها، ومينفعش نسيب الثروات دي لشوية بلطجية ومجرمين يهربوا بيها'.

واختتم: 'ودي رسالة للكل، وده أمن قومي لبلدنا، والإجراءات هتكمل، وأمننا خط أحمر، محدش يقرب منه في أي حتة، إحنا بنتكلم عن دولة مسؤولة عن 110 مليون مواطن وضيوف موجودين على أرضها، واللي هيعمل كده يلوم نفسه، ومصر مبتهزرش في أمنها القومي'.