أسما شريف منير تتحدث عن معاناتها مع اضطراب التعلق القلق: بحاول أرمم قلبي من ناس أذوني

تحدثت أسما شريف منير عن معاناتها مع اضطراب التعلق القلق Anxious Attachment خلال الثلاث سنوات الأخيرة.

كتبت أسما شريف منير تزامنًا مع الاحتفال بعيد ميلادها: «النهاردة عيد ميلادي، وآخر سنة ليّا في الثلاثينيات، ودي صور النهارده مفيش بهرجة، زمان كان عيد ميلادي ده احتفال مش عادي، أهلي كانوا بيحجزوا أماكن ويجيبوا magician وDJ ويبعتوا دعوات لـ100 واحد، وعمري ما كنت بشوف عيد ميلادي يوم عادي أو حاجة صغيرة».

معاناة أسما شريف منير مع اضطراب التعلق القلق

وتابعت: «بالعكس كان دايمًا يوم كبير جدًا بالنسبة لي، وكنت بعدّ الأيام من أول مارس لحد ما ييجي.. بس آخر 3 سنين عدّوا عليا بألم كتير وخيبات أمل وانكسارات وخذلان، وشوية شوية بطلت أهتم بعيد ميلادي، بطلت أخطط، بطلت أعد، بطلت أستنى، لأني كنت مشغولة أحاول أنقذ نفسي وأتعالج وأقوم وأشتغل على الـ anxious attachment بتاعتي وأرمم قلبي من وجع ناس أذوني وما حاولوش عشاني وسابوني، وده أخد مني كتير أوي عشان أكون أحسن وحقيقي أتعافي».

واستكملت أسما شريف منير: «من السنة اللي فاتت بدأت رحلتي الروحانية مع ربنا، ولقيت فيها حاجات كتير ولسه بدور ولسه بتعلم ولسه بكتشف، بس السنة دي جزء كبير مني مش عايز عيد ميلاد شكله حلو من برة بس مش حقيقي، أنا عايزة دعاء من القلب/ مابقتش عايزة أتمنى وأطفي شمعة وأمنية سطحية واقلب».

عيد ميلاد أسما شريف منير

وأضافت: «بقيت أطلب من ربنا بشكل واضح اللي أنا حقيقي بتمناه، وعندي إحساس إن السنة دي هتكون سنة تحوّل حقيقي، سنة تطهير كبير ومعتقدات جديدة وبداية جديدة.. أحس بالهدوء، وإني أحس إني محبوبة ومقدّرة وآمنة بجد، وإني أكون حواليّا ناس بتوعد إنها متمشيش، والناس دي موجودة في الصورة دي، الناس دي ما سابتنيش، وماخلتنيش أحس إني بشحت حب أو دعم، حبوني من غير أي طلبات أو مقابل ووقفوا جنبي في أظلم أوقاتي وماحسسونيش أبدًا إني أقل من إني أتحب».

واختتمت أسما شريف منير: «جوزي وبنتي ربنا يبارك فيهم، الاتنين دول بيتي، الاتنين دول صدقوا فيّا وحبوني وأنا في أصعب أوقاتي، ومن غير ما أطلب، وبالحب ده رمموا جزء جوايا ماكنتش متخيلة إنه ممكن يتصلح، وشالوا عني إحساس الهجر وإحساس إني مش كفاية وإني مش مستاهلة محاولة».