أمير طعيمة عن تعاونه مع عمرو دياب في ألبوم «حبيتك»: لكل فنان كتالوج خاص

أعرب الشاعر أمير طعيمة عن سعادته بالمشاركة في ألبوم حبيتك مع الفنان عمرو دياب، بأغنيتي «حبيتك، وأنا معاك».

قال أمير طعيمة عبر تصريحات تلفزيونية: «أنا مبسوط جدًا بالأغنتين، واشتغلنا الصيف اللي فات، وده والحمدلله رجعنا نشتغل بقوة من العام الماضي والألبوم الأخير».

وتابع: «لما بشتغل مع المطربين، زي البشر كل شخص فيهم له كتالوج معين، زي كل البشر، وكل حد مختلف عن التاني، وبالنسبة لعمرو، مثلا ممكن يشتغل على 4 أو 5 أغاني ويكون حاببهم كلهم، وفي مرحلة الاختيار النهائي، ومع تشكل ملامح الألبوم، ممكن يستبعد أغنية ممكن تكون حلوة جدًا وممكن ده يزعل ناس لكن هو نيته وقصده أن أغاني الألبوم تتشابه».

واستكمل أمير طعيمة: «اشتغلنا وخلصنا أغاني أكتر من اللي نزلوا، وأنا حبيت أغنية حبيتك، والحمدلله كلامها مختلف بلا غرابة، وأنا عندي أسلوب وطريقة مختلفة في الكتابة، وليها مفردات وأسلوب لم يستخدما من قبل، وهي مناسبة للأفراح والسهرات».

واختتم: «عمرو دياب فنان شديد الذكاء، بيعرف ياخد إيه، ومن مين، ومكانه فين في الألبوم، وبيعمل ده على طول، زي أغنية يوم تلات وكانت وقتها برضو غريبة، هو بيبقى عارف، وإحنا شغالين، إيه اللي هنخرج بيه في الآخر».