إلهام شاهين تكشف سرا: ارتديت الأسود 10 سنوات متواصلة حتى أثناء النوم

كشفت الفنانة إلهام شاهين أسرار من حياتها الشخصية، وتحدثت عن والدتها الراحلة متذكرة اللحظات القاسية بعد رحيلها.

قالت إلهام شاهين عبر تصريحات تلفزيونية: «ماما شبه مين؟ أنا شبهها في كل حاجة ما عدا طيبتها الزايدة، لا مش في كل حاجة.. أنا شبهها في الشكل يعني هتحسي الملامح فعلاً واحدة.. وبعدين أنا وماما كنا يعني حاجة واحدة، قريبين أوي من بعض».

تصريحات إلهام شاهين عن والدتها

وتابعت: «الله يرحمها وخصوصًا بقى لما بيجي أوقات كده زي رمضان أو مناسبة عيد اللي هي فيها لمة الأسرة، على طول كلنا بنحس إننا مفتقدين ماما جداً جدًا، وكنت هبقى شاعرة بالأمان، أنا من بعد وفاتها مفيش أمان، مفيش استقرار، مفيش راحة، ومفيش سعادة.. يعني مفيش حاجة مهما حصلي من أحداث كويسة أنا ما بفرحش عادي».

واستكملت إلهام شاهين: «وحتى لما كنت أعمل عمل النجاح بالنسبة لي إن ماما لما هتتفرج هتقولي إيه، رأيها إيه.. لما أخد جائزة مثلاً تبقى عارفة إن أنا وتسألني هو ده مثلاً هيتذاع على الهواء أو تبقى موجودة معايا أبقى مستنية أشوف الفرحة في عينين ماما إن أنا مثلاً باخد جائزة في مهرجان أو كده».

أسرار إلهام شاهين

واعترفت إلهام شاهين أنها دخلت في حالة اكتئاب شديدة بعد وفاة والدتها، معلقة: «أنا قعدت لابسة 10 سنين أسود.. حتى وأنا نايمة يعني البيجامة أو قميص النوم أسود.. 10 سنين».