«افتكروني مجنونة».. زينة تكشف معاناتها مع الولادة بالغربة وفقدان أولادها لشعور الأب

تحدثت الفنانة زينة عن أصعب الفترات التي مرت بها في حياتها، من ولادتها في الغربة بمفردها، وتربيتها لأبنائها.

قالت زينة عبر تصريحات تلفزيونية: «شوفت في حياتي حاجات محدش يقدر يتجاوزها.. ومحدش يقدر يعيش اللي أنا عيشته.. مرحلة أني بولد في الغربة لوحدي وولادي اتولدوا تعبانين أوي وكل يوم بكتشف فيهم مرض جديد».

أصعب الفترات في حياة زينة

وتابعت: «أنا فاكرة أنهم كتفوني عشان يغيرولي على الجرح.. اسمع أن اللي والدة المفروض تاكل كويس وتتغذى وأنا كنت بنسى أشرب ماية وفي المستشفى افتكروا أني مجنونة وجابولي شيخ ودكتورة نفسية وكانوا هياخدوا عيالي مني والمترجمة قالتلي اسكتي خالص عشان عيالك أمريكان وهيخدوهم».

واستكملت زينة: «والدكتورة الكبيرة قالتلي لو كل الأمهات في البلد بتاعتك زيك دي تبقى أعظم بلد في العالم».

زينة

تصريحات زينة

وفيما يخص فقدان أولادها شعور الأب، قالت إنهما لا يعرفان مدى أهميته لأنهما لم يجربا هذا الإحساس من قبل، مؤكدة أنها امرأة قوية لأنها تقوم بدور الأم والأب معًا، معلقة: «ولادي مش مفتقدين الأب لأن اللي مجربش حاجة معينة مش هيشعر بفقدها ومش حاسين بأهميته.. وبشوف إني قوية عشان بسد خانة الأب والأم، ولو رايحة مكان وقالولي لاء متروحيش بسمع كلامهم عشان معنديش أغلى منهم».

وأعربت زينة عن حزنها الشديد بعد فقدان والدها، وقالت وهي تبكي: «أي حد عاوز يقرب مني كان بيعمل نفسه زي بابا من كتر حبي له، وأنا كنت بتخدع بـ ده كتير، ومش قادرة أتعامل مع موضوع وفاة والدي لحد دلوقتي بالرغم من أنه اتوفى من كتير أوي وأنا في أوائل العشرين من عمري، ودايمًا بفتكر له كل حاجة حلوة، وهو كان حنين وعشان كدة تعبت أوي بعدها ولحد دلوقتي بحتاجه، وروحي مبقتش زي ما هي، عمره ما ضربني ولا حرمني من حاجة، أنا كنت بخاف أغلط عشان مزعلوش، ومستغربة أني لسه مكملة، وكل الحب ده بطلعوا في أولادي لأن الحب اللي جواك كله بيطلع، وأخر مرة حضنت فيها أبويا قبل ما يسيبني بيوم وكان نفسي يشوف عز وزين».

رسالة زينة لأولادها

وقالت زينة في رسالتها لأولادها: «أنا بحبكم، وأنا بربي رجالة ناجحين ودايمًا كنت بدعي وبقول يارب أجعل العوض فيهم وأجعلهم ناجحين فالحين حافظين قرآنك وسنة الرسول».

وأضافت: «كل واحد فيهم واخد حتة معينة غالية أوي، وكل واحد له حتة مش الاتنين نفس الحتة، متساويين في الغلاوة بس بشكل مختلف، بحس إن هما بني آدم واتقسم نصين، نص أنا ونص مش أنا بس بحبه والنصين عندي بيخلوني أقعد افكر كتير، أنا كنت فاكرة في الأول إن أنا شخصية مهمة بس لما كنت بقعد لوحدي بحس إني ولا حاجة، بس من ساعة ما خلفت ولحد دلوقتي أنا طول الوقت حاسة إني حاجة كبيرة أوي لأني أم للاتنين دول، كنت حاسة إني ماليش قيمة ولا لازمة، بقى ليا لازمة وبقيت أخاف على نفسي، بخاف على عمري لأن هما محتاجيني».

واستكملت زينة: «هو ده الحب الوحيد اللي بتدي فيه وأنت مش عايز مقابل، أنا مش مستنية منهم حاجة.. ابني ساعات بيقولي مثلا لما تكبري ولما تحتاجي مش عارف إيه يا مامي لازم تعمليلي كذا فبقوله يا حبيبي أنا مش عايزة منك حاجة، قالي طب لو تعبانة؟ قولتله سيبني أنا مش عايزة منك حاجة، أنا بربيهم لله، بربيهم عشان ربنا وعشان بحبهم، ربنا حط حب ليهم في قلبي غير طبيعي، أنا مشوفتش حد كدة، أنا ممكن اتخانق مع عيال صغيرة عشانهم وبخاف على عيالي من المرض، صحتهم ضعيفة يعني مش عيال أقوياء عشان اتولدوا 7 شهور، وعندهم نوع أنيميا صعب شوية، وبيلعبوا رياضة على طول بس بيتكسروا بقى».

وتابعت: «أنا اتظلمت كتير.. ومش فاكرة الإنسان اللي غلط فيا.. لو افتكره هسامحه، وأتمنى أن كل الناس متقابلش أشخاص كذابة أو مزيفة أو ناس بتدعي التدين وبتدعي أنها محترمة.. دي حاجات أنا مريت بيها ومحبش حد يمر بيها».

زينة

اسم زينة الحقيقي

كشفت الفنانة زينة سبب تغيير اسمها من وسام لزينة، كما تحدثت عن تفاصيل طفولتها وتعرضها للاكتئاب.

قالت زينة عبر تصريحات تلفزيونية: «في بداياتي قالولي لازم تغيري اسمك عشان وسام اسم ولد، وكنت صديقة مقربة لعمرو دياب وهو الذي اقترح عليّ اسم زينة على اسم زوجته السابقة وأشعر أنه اسم خاص بعائلتي والبيت فقط وأغلى عندي من زينة لأن والدي كان يحبه».

وقالت عن طفولتها: «دلع وحب وشقاوة غير طبيعية، طول عمري طفلة مميزة وبعد والدي لا يوجد أي شخص يعرفني أو يفهمني».

واستكملت زينة: «والدي زعل مني مرة واحدة فقط وأول مرة يمد إيده عليّ ويشد شعري بعدما ألحيت عليه في طلب معين أكثر من مرة».

وأشارت إلى أن الرجال عندما كانوا يتقربوا منها يمثلون أن لديهم طباع تشبه والدها، وكانت تصدقهم، وفي النهاية تتعرض للخداع.

واختتمت حديثها: «عمري ما خوفت من والدي ولكني لم أرغب في أن أضايقه بسبب حبي له»، ولافتة إلى أنها تتعرض كثيرًا للاكتئاب وفي إحدى المرات قيل لها «إنتي إنسانة متعرفيش تعيشي من غير مشاكل» وقتها انزعجت ولكن فيما بعد اكتشفت أنها تحب أن تعيش في أكشن.

زينة