التصريحات الكاملة للفنانة منة شلبي: كنت كارثة في فيلم الساحر وعذبت محمود عبد العزيز

تحدثت الفنانة منة شلبي عن كواليس لأول مرة من فيلم الساحر، وأسرار من حياتها الفنية والشخصية، وكشفت أيضًا حقيقة خلافها مع الفنانة هند صبري.

تصريحات منة شلبي

قالت منة شلبي في تصريحات تلفزيونية لها إن محمود عبدالعزيز كان بالنسبة لها مثل والدها، وهو أول من قدمها للجمهور من خلال فيلم الساحر.

وتابعت: «محمود عبد العزيز أبويا وأستاذي، ومحمد وكريم إخواتي، وفي الحياة كان أكتر واحد أنا وأمي بنلجأ له، وهو وأولاده كانوا رجالة وإخواتي، وأول مرة أروح كاستنج محمد كان معايا وهو بالنسبالي أخويا».

منة شلبي

منة شلبي ومحمود عبد العزيز

واستكملت منة شلبي قائلة: «محمود عبد العزيز مخلفش بنات وبالنسبة له أنا كنت بنته، وأمي مأنجبتش غيري، لذلك أمي كانت تتعامل معاهم على إنهم أولادها، وأنا عذبتهم أثناء تصوير فيلم الساحر، لأني مكنتش بعرف أمثل وتمثيلي كان زي الزفت، لدرجة كنت بقف قدام أستاذ محمود عبد العزيز وأقف ساكتة مقدرش أتكلم».

وقالت أيضًا: «ومكنتش بعرف أنطق وبتكلم في سري ومش فاهمة الكلام وكنت كارثة في فيلم الساحر، زمان كنت تخينة وبحب الأكل جدًا، وخسيت شوية فخدوني وخلاص، بعدها رجعت تخنت تاني، لدرجة إن أستاذ رضوان الكاشف كان بيقوللي هو أنا بصور فيل».

منة شلبي فيلم الساحر

وأضافت: «أنا كنت أقعد أعيط، وبالمناسبة أنا لسه بحب الأكل لحد دلوقتي بس هذّبت نفسي ومكنتش مصدقة إن دوري كبير، لدرجة لما شفت السيناريو قولت لأستاذ رضوان، حضرتك متأكد إني بعمل دور نور، وكنت أعرف إن تمثيلي زي الزفت، وكنت مبعرفش أعمل حاجة قدام أستاذ محمود، وكنت أخرج من اللوكيشن بشكل خاطئ».

وفيما يخص حقيقة خلافها مع الفنانة هند صبري في بداية حياتهما الفنية، قالت إن علاقتهما لم تكن جيدة، ولم تكونا مقربتين، معلقة: «مكنش لينا في بعض أوي، مكنش فيه خناق، بس مكنش فيه حب وطلعنا مع بعض تقريبًا في نفس الوقت، هي كانت بتعمل مواطن ومخبر وحرامي ومذكرات مراهقة، وأنا كنت بعمل الساحر، وبحب السيما».

منة شلبي

منة شلبي وهند صبري

وتابعت منة شلبي قائلة: «أدوارنا كانت جريئة في الأول، بالمقارنة بالأفلام المعروضة في الوقت ده، كنا متنافسين تمامًا ولسه صغيرين، فأي حد كان بينقل كلام بينا، كنا بنسخن، و«اشتغلنا مع بعض فيلم أحلى الأوقات، وكل واحدة فينا كانت كتفها عالي على التانية، بس كنا محترمين، وبعدين اتعرض عليا فيلم بنات وسط البلد والمخرج محمد خان قاللي إننا هنكون بطلتي الفيلم، قلت له مفيش مشكلة أنا محترفة».

وجلست مع الفنانة هند صبري خلال التحضير لفيلم بنات وسط البلد، مضيفة: «اكتشفنا إنه لا يوجد خلاف بيننا، وإن الأمر عبارة عن كلام تنقله أطراف بينا، وقعدنا في بيت محمد خان واتصافينا، وبعدها بقينا شيء تاني خالص، بقينا زي أصحاب المدرسة».

منة شلبي ووالدتها

وقالت منة شلبي عن والدتها الفنانة زيزي مصطفى، إنها استثنائية وضحت من أجلها وتركت عملها بسببها، مضيفة: «ماما كل حاجة ومش أم تقليدية وهي ست عظيمة وكل حاجة في حياتي، ولو عندي صفة كويسة في شخصيتي فهي من والدتي».

واختتمت: «سواء إني بتحمل مسئولية أو جدعة أو أي حاجة كويسة عندي فأنا خدتها من أمي، وعملت تضحية معتقدش إن فيه حد يقدر يعملها وبعد ما بقيت فنانة، ولما كنت في سن صغير قررت تسيب شغلها خالص عشان تكوني كشخص وبني آدم وطالبة وكبنت وفنانة وربنا يحميها».

منة شلبي ووالدتها

منة شلبي