الحكاية الكاملة لـ سائق أوبر مع الفنانة هلا السعيد.. انتهت بحبس عام

قررت محكمة جنح الشيخ زايد، اليوم، حبس سائق “أوبر”، المتهم بالتحرش بالفنانة هلا السعيد على محور الضبعة لمدة عام وكفالة مالية 1000 جنيه.

وكانت قد كشفت الفنانة هلا السعيد عن تعرضها للتحرش من سائق أوبر، من خلال فيديو عبر حسابها الرسمي بموقع 'إنستجرام'، قائلة: 'أنا حاليًا على محور الضبعة، وكنت راكبة أوبر، لقيت السواق يوقف العربية ونزل منها وقال لى انها سخنت، وبابص ورايا لقيته يفك حزام البنطلون ونزلت من العربية بسرعة، وهو قال لى ماتخافيش ماتخافيش أنا عندي السكر ولازم كل شوية ادخل الحمام'.

وتابعت السعيد: 'نزلت من العربية وسيبت شنطتى والحمد لله إني كنت بتكلم في التليفون قبل ما العربية تقف واتصلت بأحد من أصدقائي قلت له إني أرسلت له لايف لوكيشن وتقريبًا هذا ما جعل السواق يخاف، والحمد لله إننا الصبح ولسه قريبة من بيتي'.

إحالة المتهم للمحاكمة

نيابة الشيخ زايد أحالت سائق أوبر، المتهم بالتحرش بالفنانة هلا السعيد أعلى محور الضبعة، إلى محكمة الجنح بعد حوالي أسبوع من الواقعة حيث اتهمت الفنانة هلا السعيد السائق بالتحـ ـرش بها وتم إحالته للمحاكمة بتهمة التبول في الطريق العام.

أقوال المتهم أمام النيابة

وقال مصطفى سائق أوبر في مقطع فيديو أن الحادث وقع منذ حوالي أسبوع قرابة الساعة الحادية عشرة والنصف صباحا، عندما تلقى طلبا من شخص يدعى 'جلال' للذهاب الى مدينتي عقب عودته من الشيخ زايد، وتوجه الى الموقع المحدد وشاهد العميل سيدة فتأكد من طلبها للسيارة وعندما أكدت له انها العملية أقلها واتجه الى المكان المحدد.

أضاف سائق أوبر أن سيارته تعمل بالغاز والبنزين وأثناء القيادة اعلى محور الضبعة وقبل كارتون كوبري تحيا مصر بمسافة قليلة، نفذ منه الغاز، فقال إن السيارة تلقائيا بالعمل على 'طلمبة البنزين' فكان يجب ايقاف السيارة حتى تعمل طلمبة البنزين جيدا واستأذن العميلة في التوقف فوافقت.

وفجرت تحريات الأجهزة الأمنية في واقعة الفنانة هلا السعيد، واتهامها لسائق أوبر بالتحرش بها أعلى محور الضبعة، مفاجأة، أحالت على أساسها النيابة، المتهم، إلى محكمة الجنح.

تحريات الأجهزة الأمنية

وطلبت النيابة تحريات الأجهزة الأمنية حول ملابسات البث المباشر الذي أجرته الفنانة هلا السعيد، وجاءت التحريات بعدم صحة الواقعة، وأن المتهم لم يتحرش بالفنانة هلا السعيد، وإنما ارتكب فعلا فاضحا فقط بالتبول في الطريق العام.

وقال سائق أوبر في تحقيقات واقعة هلا السعيد، اللي حصل أني شغال أوبر على العربية بتاعتي وقبلت الرحلة وأنا على طريق الضبعة طرمبة البنزين سخنت مني قولتلها هنقف دقيقتين بس الطرمبة تهدى شوية ونتحرك ونزلت من العربية.

وتابع سائق أوبر بقضية هلا السعيد، نزلت من العربية وفتحت الشنطة الخلفية عشان أقضى حاجتي بعد كدة لاقيتها فتحت الباب ونزلت جري انا استغربت وقفلت حزام البنطلون بسرعة وبعد اقل من نص دقيقة اتحركت بعيد عنها على رجلي عشان أنا تعبان ومقدرش امسك نفسي من التبول.

واستكمل سائق أوبر بقضية هلا السعيد، مكنتش قادر أمسك نفسي عشان تعبي وبعدها روحت لها وقولت لها مفيش داعي لكل ده انا تعبان ومريض واتحرجت اقولك انا نازل اقضي حاجتي بعدها قولت لها من غير خوف انا هنزلك الشنط بتاعتك وأمشي وعملت كدة ومشيت فعلا.

هلا السعيد

وتضمنت التحقيقات نص اقوال الفنانة هلا السعيد وجاء بها بعد حلف اليمين:

ما تفصيلات شكواك تحديداً ؟

اللي حصل إن أنا امبارح ۲۰۲٤/٥/٢٢ حوالي الساعة ۳۰ : ۱۱ الصبح كنت نازلة من بيتي علشان كنت رايحة مشوار في مدينتي وساعتها طلبت على أوبر عربية علشان توصلني لمدينتي وفعلاً التطبيق أوبر جبلي العربية اللي رقمها ب ر ق /٤٥٧ ماركة بي واي دي فيراني اللون واسم القائد السيارة مصطفى وهو ده اللي قبل الريكوست وجالي عند بيتي في سوديك وركبت معاه وساعتها متكلمش معايا خالص ولقيته ماشي وواخد طريق محور الضبعة علشان يوديني لمدينتي.

وفجأة وأنا راكبة معاه خلال سبع دقائق لقيته هدى بالعربية وراح راكن علي جنب وساعتها سألته انت وقفت ليه راح قايلي علشان فيه عطل في العربية وقالي ان الطرمبة سخنت ولقيته نزل من العربية وراح لافف ناحية الشنطة وفتح شنطة العربية وساعتها سمعت صوت خبط في شنطة العربية فأنا حسيت ان هو بيجيب حاجة منها فلفيت علشان اشوف هو بيعمل إيه فلقيت حزام وزرار بنطلونه مفتوح وكان حاطط ايده علي مكا حساس معرفش هو بيعمل ايه وانا ساعتها خوفت منه علشان الطريق كان مقطوع والمشاكل اللي بتحصل اليومين دول روحت فاتحة باب العربية ونزلت أجري حوالي ٢ متر لورا تقريباً وساعتها فضلت اشاور للعربيات علشان حد يقفلي بس محدش وقفلي.

وتابعت: وهو لما لقاني عمال اشاور واستنجد بالناس راح قافل بنطلونه وراح قايلي انتي خايفة من ايه انا مش هعملك حاجة اركبي معايا وانا هوصلك خلاص ومتخافيش انا مش هعملك حاجة بس انا مردتش اركب معاه وراح واقف اتبول في الشارع وقاللي علشان انا عندي سكر ولازم كل شوية أفك مية.

وراح قايلي انتي فيه حد جايلك قولتله ايوه فقالي خلاص انا هفضل واقف لحد ما الشخص اللي جاي يجيلك لقيته راح منزلي شنطي من العربية وحطها في الشارع ولقيته ساعتها فضل واقف حوالى دقيقة وراح واخد بعضه وماشي ولاغى الريكوست على اوبر وساعتها روحت صورت نفسي بموبايلي عشان اثبت الواقعة وبعديها السواق بتاع جاري اللي كان جايلي جه ووصلني للبيت وبالليل يومها روحت على قسم ثان الشيخ زايد وعملت المحضر وهناك قالولي اطلعي بكرة على النيابة علشان أقول اقوالى وهو دا كل اللي حصل .

حكم اليوم

قررت محكمة جنح الشيخ زايد، اليوم، حبس سائق “أوبر”، المتهم بالتحرش بالفنانة هلا السعيد على محور الضبعة لمدة عام وكفالة مالية 1000 جنيه.