انفجار الزايدة المفاجئ.. تامر حسني يكشف تفاصيل الحالة الصحية لابنه آدم

كشف الفنان تامر حسني عن تفاصيل الأزمة الصحية التي تعرض لها نجله آدم، موجهاً الشكر لجمهوره وكل من سانده في هذه المحنة.

وكتب تامر عبر حساباته الرسمية:'أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا و على تليفوني و تليفونات كل المحيطين بيا. هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس'.

وأضاف تارم حسني قائلاً: وبقولكم كده عشان تبقوا حريصين مع نفسكم أكتر ولولادكم، و  مش كل سخونية تقولوا ده شوية برد و خلاص، لا روحوا اكشفوا كويس و اعملوا سونار على البطن و الزايدة مرة و ٢ عشان برضو ساعات مش بيبان و لازم الدكتور يضغط بطريقة معيّنة، تقريباً أقوى شوية عشان يعرف؛ لإني سمعت كتير اليومين دول إن الزايدة خادعة… اطمنوا كذا مرة قبل لحظة انفجارها عشان بجد مشاكل بتحصل بعدها كبيرة و محزنة أوي'.

وأوضح تامر حسني تفاصيل الحالة الصحية لابنه آدم، قائلاً: 'وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب و يعدي مرحلة الخطر، يارب، بحق “كن فيكون” اشفيه وعافيه، هو و كل ولادنا، بس هو راجل و هيتحمل وإن شاء الله ربنا يكرمه و يعافيه و يحفظه هو و إخواته و يحفظ كل ولادكم يارب'.

وتوجه تامر حسني بالشكر لجمهوره قائلاً: 'أحب أقول تاني شكراً من كل قلبي على دعواتكم، أنا شايف قلب كل حد فيكم و هو بيدعي بصدق. متشكر أوي يا جماعة شكراً لكل اللي اهتم وسأل عن ابني و دعاله هنا أو على التليفون، واللي طلعوله صدقات لشفائه من غير ما يعرفونا شخصياً.. أنا مش لاقي كلام أشكركم بيه و أنا برضو بدعيلكم و بقول لكم مثلها وأضعاف أضعافها، و ربنا يحفظكم ويحفظ أولادكم قادر يا كريم'.

وجاءت رسالة تامر حسني لتعكس حالة القلق والامتنان العميق لكل من وقف بجانبه خلال هذه الأزمة الصعبة، مع حرصه على توعية جمهوره بأهمية الحذر ومتابعة الأعراض الصحية بدقة.