بطل واقعة إنقاذ والده ببني سويف: رنيت على الإسعاف وكنت خايف يفتكروه مقلب.. فيديو

تصدر محمد رضا، البالغ من العمر 13 عاما، حديث مواقع التواصل الاجتماعي، بعد موقفه الشجاع في التعامل مع تعرض والده لوعكة صحية مفاجئة أثناء وجودهما على الطريق الصحراوي.

وقال خلال مداخلة هاتفية مع الإعلامية نهال طايل في برنامج «تفاصيل» المذاع على قناة صدى البلد2: «الدكاترة طمنونا وقالوا ممكن يطلع النهارده بالليل أو الصبح، وبيحرك إيده ورجله، بس المشكلة في لسانه تقيل.

وروى تفاصيل الواقعة: «إحنا كنا نازلين من سوهاج ومروحين البيت زي كل نقلة بنطلعها، وقف على الطريق على جنب وكان عطشان، كان من 10 ونص لـ11 إلا ربع، نزلت أجيبله قزازة مياه، وطلعت العربية تاني معاه لقيته مش قادر يتكلم ولا يتحرك ولا أي حاجة، أحاول أفوقه، أغسل وجهه مفيش، رنيت على الإسعاف وأنا كنت خايف يفكروني بعمل مقلب فيهم ، بس الإسعاف في خلال 3 دقايق كان واقف قدامي، وخدوا بابا على مستشفى الجامعة».

وأضاف: «ارتحت إن أنا عرفت أجيبله حاجة نعرف نعالجه بيها، ولحقناه بالحقنة العينية، لو ماخدهاش في خلال 3 لـ4 ساعات مكنش ينفع ياخدها خالص».

وأوضح: «أنا كلمت الإسعاف وقولتلهم إن بابا تعبان على الطريق ومحتاج عربية تلحقه بسرعة لأنه تعبان، وهما ما اتأخروش عليا، والمسعف فضل معايا لحد ما العربية وصلت، فضل يقولي العربية بقت فين، وصلت فين دلوقتي، لحد ما العربية كانت قدامي، لأننا كنا على الطريق الصحراوي برة مش جوة مدينة».