بعد "وننسى اللي كان".. عمرو محمود ياسين يتخذ قرار جديد بشأن أعماله المقبلة

أعلن الفنان والسيناريست عمرو محمود ياسين، قرار جديد يخص أعماله بعد نهاية مسلسل وننسى اللي كان الذي نافس به ضمن موسم دراما رمضان 2026 مع الفنانة ياسمين عبدالعزيز.

كتب عمرو محمود ياسين في منشور عبر حسابه الرسمي بموقع فيس بوك:  "وبنهاية  (وننسى اللي كان) انتهت سلسلة الواو".

وبذلك يعلن عدم تسمية مسلسلاته الجديدة بعناوين أو أسماء تبدأ بحرف الواو، بعد مسلسل "ونحب تاني ليه"، و"وتقابل حبيب” و"ونحب تاني ليه"، ومؤخرًا “وننسى اللي كان”.

وكان قد علق السيناريست عمرو محمود ياسين مؤلف مسلسل وننسى اللي كان على انتقادات العمل، وحقيقة تشابهه مع نهاية مسلسل علي كلاي.

كتب عمرو محمود ياسين في منشور عبر حسابه الرسمي بموقع فيسبوك: "هبدة كل سنة.. يقولك النهاية اتغيرت.. أولا مفيش مرة بدخل فيها أي عمل وببقى مش محدد النهاية إيه كإطار عام.. عشان ده  أكتر شيء بيسهل رحلة الكتابة .. لأني عاوز أوصل لنقطة بعينها.. فعندي هدف .. ثانيًا سيكونس مشاهد ال MMA اللي قبل مشهد النهاية .. ده معروف ومتحدد من زمان لأن الأمور دي عايزه تجهيز .. يعني لازم نعمل معاينة .. نحجز مكان .. نجهز ديكور .. إضاءة .. نحجز  مجاميع .. يتعمل أوردر عمل .. الخ .. الخ".

وتابع: "ولسه كل ده مابتدناش التصوير اللي بياخد  يوم كامل على أقل تقدير وإنتوا أكيد شوفتوا الكواليتي اللي متقدم في المشاهد دي .. وده كواليتي ماينفعش يبقى الو .. صباح الخير .. ماتيجوا نعمل مشاهد ضرب للركب ويلا بينا.. إيه السذاجة دي بجد؟.. التصوير مش موضوع سهل ده معقد جدًا و مليء بمئات التفاصيل (وخصوصًا لو أكشن)"

واستكمل عمرو محمود ياسين: "ده غير أن  البطولة اللي بيخوضها بدر السباعي واللي أهلته لبطولات اهم كما ظهر في الفوتومونتاج الذي تلي البطولة كانت ضرورية لتأمين نهاية سعيدة.. لأن مش معقول أن  جليلة وبدر يقدروا يعيشوا حياة سوية في ظل وجود فجوة كبيرة بينهم ..!  يعني كان ضرورة دارمية  محددة عندي من البداية  بما إني من البداية أيضًا مستهدف النهاية السعيدة .. فالموضوع متفق عليه من بدري جدًا ومعروف للجميع .. حتى الأغنية كانت متحددة ومتفق عليها من بدري ..(أغنية كله بيقلدك)".