بعد 13 عاما.. خالد النبوي يكشف أسرار جديدة عن فيلم الديلر لأول مرة

تحدث الفنان خالد النبوي عن كواليس واحدًا من أبرز أعماله، فيلم «الديلر»، وحديثه باللغة الروسية لأول مرة.

قال خالد النبوي عن كواليس فيلم الديلر، عبر تصريحات تلفزيونية له: «في فيلم الديلر عندي خطبة بالروسي وأنا معرفش أتكلم روسي بس الفكرة إنى لازم أدهش الناس».

خالد النبوي فيلم الديلر

وتابع: «قعدت أذاكر المشهد 3 أشهر وذهبت إلى المركز الثقافي الروسي في القاهرة، من أجل تعلم إلقاء الخطبة بالروسي، وهنا أنت مش شايف خالد النبوي شايف علي الحلواني الشخصية ومش عاوز تبقى نمطي.. مشهد الخطبة كان عندي تصور كبير له وذهبت للتحدث مع المؤلف مدحت العدل، وهو شخص في قمة التواضع».

واستكمل الفنان خالد النبوي حديثه عن فيلم الديلر الذي تم عرضه عام 2010: «ووافق لأن المشهد في شاشات كبيرة ومجاميع هيكون مكلف في أوكرانيا وإزاى نقنع المنتج سامي العدل الله يرحمه وقتها بالفكرة ووافق وظهر المشهد زى ما إحنا عاوزين بالظبط».

خالد النبوي

خالد النبوي ونور الشريف

وكشف أيضًا رأي الفنان الراحل نور الشريف به وحديثه مع والده قبل الشهرة، ورد فعل والده على عمله بالتمثيل، قائلًا: «والدي لما عرف إني اشتغلت في التمثيل لقيته بيقولي أنت فاكر نفسك هتبقى نجيب الريحاني.. وأنا كمان كنت بقول لنفسي هو أنا ممكن أبقى زي نجيب الريحاني مش معقول ومش سهل أبدًا تبقى نور الشريف، أنا دخلت المكتب عنده وشوفت الـ 22 جزء من موسوعة قصة الحضارة وهو كان بيعملنا لقاء علشان فيلم عايز فيه شباب صغير من المعهد».

وأضاف الفنان خالد النبوي: «فأنا لما شوفت هو بيتعامل مع الكتاب إزاي قلت أنا عايز يبقى عندي الكتاب ده وفعلا جبته، وهو اللي قالي لازم تستمر أنا كنت برفض أعمال هو قالي السينما لازم استمرار وإوعى تبعد حتى لو السيناريو مش عاجبك أعمله ومتقعدش في البيت لأن وأنت بتشتغل هيجيلك السيناريو اللي يعجبك لغاية لما تقدر تتحكم ومتعملش غير الكويس».