بهجت عدلي: تركت الصيدلة منذ 22 عاما واتوعدت أشتغل في العتاولة

كشف الفنان بهجت عدلي أسباب غيابه عن الساحة الفنية، وتحدث عن دور نقابة المهن التمثيلية في تشغيل الفنانين.

قال الفنان بهجت عدلي عبر تصريحات تلفزيونية له: «الفن مالوش أمان بمعنى أن الفن يخليك تعوز وتحتاج، أصل ده بمزاجك ومحدش غصب عليك أنك تدخل الفن».

تصريحات بهجت عدلي

وتابع: «مع احترامي لكل الشخصيات اللي بتكتب أنهم مش لاقيين شغل أنا مبحبش ده، والنقابة مبتشغلش حد، أشرف زكي بيعمل حاجات تانية يشكر عليها وإحنا كجمعية عمومية مش عايزين غير أن النقابة تطبق القانون والشركات تشغل 10%، ولكن في شلالية موجودة ومجموعات كتير، ولو النقابة تقول مفيش أكتر من 10% كله هيشتغل، والقانون مبيتطبقش، ودكتور أشرف زكي بيعمل كاستينج وبيروج للممثلين تاني، في ناس قاعدة في بيوتها مش لاقية تاكل وهما أعضاء نقابة».

واستكمل الفنان بهجت عدلي: «أنا ملجأتش لأشرف زكي في الوقت اللي مكنتش بشتغل فيه لأني مبحبش ده، وأنا واثق أن دكتور أشرف شايف أن في ناس كتير محتاجة أكتر مني، ولكن كنت بكلم المنتجين الكبار ورفضت أدوار كتير على الرغم من الحاجة المادية لأن الأدوار مكنتش مناسبة ليا، وفي منهم دور في مسلسل معروف وكنت في أشد الاحتياج».

بهجت عدلي

بدايات الفنان بهجت عدلي

وقال أيضًا: «اتوعدت أني هشتغل في العتاولة، والمخرج تامر نادي وعدني أشتغل في مسلسل صلة رحم، ومشتغلتش فيهم، ونفسي أعمل دور قاضي فاسد».

وتحدث الفنان بهجت عدلي عن بداياته الفنية، قائلًا: «كنت بتمنى من صغري اشتغل في الفن، وظروف الأهل لأني من الصعيد وكنت في ثانوية عامة وجبت مجموع كويس دخلني كلية الصيدلة، ومكنش ينفع أقول لوالدي أني عايز أدخل معهد فنون مسرحية، خاصة أنهم عملولي صيدلية وأنا لسة طالب في الكلية على أساس أني أشتغل فيها بعد ما أخلص كلية».

واختتم: «كلية صيدلة جامعة أسيوط عملت مسرحية واحدة في تاريخها كانت إخراجي وبطولتي كان اسمها البرشام ممنوع، في فترة كان استحالة تعمل نشاط فني في أسيوط، وأنا كنت حابب ده ولما الفرصة جت في إيدي وخلصت صيدلة والجامعة دخلت التمثيل بقالي 22 سنة ماليش في الصيدلة خالص».

بهجت عدلي