بيومي فؤاد: عملت كاستينج مع يسري نصر الله لكن مخدنيش.. وزوجته: مدمن للعمل

تحدث الفنان بيومي فؤاد عن حبه للعمل وتأثير ذلك على علاقته بزوجته وأولاده، قائلًا: «أنا طالع لأبويا وبحب الشغل حتى في صلاتي بقول ربنا يكفينا قعدة البيت الوحشة».

وتابع الفنان بيومي فؤاد عبر تصريحات تلفزيونية: «وكم من فنانين وناس كتير لما يحالوا على المعاش بينقلب حالهم وبيجيلهم اكتئاب خاصة أصحاب الأثر والبصمة، وأنا من قبل الشهرة كنت موظف حكومة وبعمل مسرحيات كتير وممكن 3 مسرحيات في وقت واحد وكنت راضي ومكتف بذلك ومكنش في دماغي الشهرة».

تصريحات بيومي فؤاد

واستكمل حديثه عن كثرة مشاركته في الأعمال الفنية: «موضوع الكم ده من زمان.. وقبل الشهرة بشوية عملت كاستينج مع يسري نصر الله ومخدنيش، ولما قابلته بعد كدا اتكسفت أسأله، بس هو اللي قالي مش أنا كنت عملتلك كاست ومخدتكش، عارف ليه؟ علشان أنت مكنتش لايق على الدور ده».

وأضاف بيومي فؤاد: «مبتكسفش من أني أعمل كاستينج في السن ده، أحمد بدير ونور الشريف عملوا كاستينج مع يوسف شاهين في المصير».

أول أجر لبيومي فؤاد

وقال عن أول أجر له: «عملنا بروفات لمسرحية مدة سنتين، وعرضناها في مركز الهناجر للفنون الكلام ده سنة 1997، وأجري فيها كان 750 جنيه، والرقم ده أنا مصدقتش نفسي، معقول همثل والناس هتتبسط وكمان هاخد فلوس، هي دي النعم إحنا كنا بنصرف على المسرحيات قبلها».

وكشف الفنان بيومي فؤاد موقف لا ينساه في بداية تعارفه بزوجته أماني سويدان، قائلًا: «لما حصل الموضوع أنا كنت مستصغر نفسي على الارتباط مع إني مش صغير، وكان في دماغي أعتذر للبنت وشايفها مؤدبة جدًا ومحترمة وبنت ناس، وأنا الحمد لله كويس لكن مش في دماغي».

بيومي فؤاد وزوجته

وتابع: «ربنا غيّر الكلام على لساني، ولقيت نفسي بقول لها اسمي الثلاثي كذا، وأمي ست بيت، وإنتي ساكنة فين علشان أتقدم لكم والإفيه إني كان عندي مسرحية في الكلية ونزلت تسأل عني كزميلة عادي، وكنت وقتها في مأمورية تبع شغل الحكومة في المنصورة، والمخرج الله يرحمه قال لها بيومي راح المنصورة يتجوز، وهي انهارت وعيطت وفضلت تقول طيب ما أنا من المنصورة».

واستكمل حديثه عن علاقته بزوجته قائلًا: «أنا أكبر منها بكتير ومحضرتش أيامي وأنا طالب، لكن كنت أروح الكلية أساعد في الإخراج للفرقة المسرحية أو أخرج أو أمثل والمخرج تامر محسن والسيناريست محمد عبد الخالق كانوا طلبة في جيل بعدنا، وعملوا ورشة انضمت لها أماني، وشافوا إنها ممثلة كويسة، لكن مكملتش في التمثيل وكطالبة شاطرة وتحصل على امتياز بدأت تساعد في الديكور، وشافتني أيام المسرح».

كما أكد على حبه الشديد للكرة، قائلًا: «كنت حريف كورة، وكنا بنلعب في مدرسة وأحيانًا قدام سفارة أستراليا وكانوا بيمشونا وساعات الشرطة كانت تجري ورانا».

بيومي فؤاد

تصريحات زوجة بيومي فؤاد

ومن جانبها، قالت زوجة الفنان بيومي فؤاد: «في مرة من المرات وهو بيصلي على خشبة المسرح، ورغم إنها مش أول مرة، ومش هو الوحيد اللي بيصلي على المسرح، شعرت إنه سجد في قلبي، ولقيت نفسي بقول أنا بحب الراجل ده أوي والخطوة التالية كانت أغرب، روحت البيت وقلت لهم في شخص اسمه كذا هيتقدم لكم، وهو مش عارف اسمي أصلا، وكانوا في انتظاره، وبعدها اتكلمنا والموضوع مشي بإيقاع سريع جدًا».

وتابعت: «هو مدمن للعمل ودي الأزمة الكبيرة عندنا كلنا، إحنا طبعًا مقدرين شغله وحجم حب الناس له، وانتشاره وشهرته والطلب عليه، لكن في نفس الوقت حابين يكون لنا من الحب جانب، والبيت يكون له مساحة من حياته'.

وأضافت: 'إرهاقه الشديد في العمل انعكس على إني متولية معظم المسئوليات، وقلقة على صحته وأتابعه بالتليفون طول الوقت، ومؤخرًا بقى لازم ياخد باله من نفسه وصحته بأمر الأطباء وهو دايمًا يقول على نفسه أنا عشوائي، وأنا عكسه ومنظمة جدًا، وده عامل مشاكل من أيام خطوبتنا».

بيومي فؤاد وزوجته