تصريحات جريئة لـ حورية فرغلي عن محمد رمضان وأمينة خليل وطفولتها المشتتة

كشفت الفنانة حورية فرغلي حقيقة خلافها مع الفنان محمد رمضان، وعدم تبادله السلام معها.

قالت حورية فرغلي عبر تصريحات تلفزيونية: «محصلش أني رحت لمحمد رمضان الكواليس لما كان بيصور الأسطورة ومرضيش يسلم عليا، أنا كنت بصور قريب منه وقتها فيلمي طلق صناعي، وعرفت انه في نفس المكان رُحت سألت عليه قالولي بيصور قولتلهم قولوا له إني عايزه أسلم عليه، وبعدها اليوم خلص وانا كملت شغلي عادي».

حقيقة خلاف حورية فرغلي ومحمد رمضان

وتابعت: «مقولتش إني مثلت معاه مجاملة، قولت كلمني وأنا بصور حكايات بنات، واشتغل قبلها في دوران شبرا كأول مسلسل ليا، لقيته بيكلمني وبيقولي يا أستاذة لقيت المنتج اللي هيعملي أول فيلم في السينما، كنت عايز أطلب من حضرتك طلب، البنت اللي المفروض تبقى قدامي مش لاقيين حد مناسب».

واستكملت:  «قالي حضرتك ممكن تيجي مكانها، قولتله طبعًا يا حبيبي، ورحتله عند أحمد السبكي، ومضيت عبده موتة، وقولتله ده كادوه مني ليك، وبعدين عملنا قلب الأسد ومخدتش أجر».

تصريحات حورية فرغلي

وأشارت إلى أنها لا ترى محمد رمضان «نمبر وان» كما يطلق على نفسه، معلقة: «هو شايف نفسه رقم واحد ده براحته، لكن كل زملائي رقم واحد في حتتهم وشغلهم المميز، ولو عرض عليا اشتغل معاه أكيد هوافق ده نجم كبير».

وكشفت حورية فرغلي أسرار من طفولتها، قائلة: «مامتي وبابايا اتطلقوا وأنا عندي 48 ساعة، ومامتي سافرت وسابتني مع بابي، عشت 7 سنين مع بابا، وماما سنتين، وبعدها تنقلت لوحدي بين فرنسا ودبي ولندن».

وفيما يخص أنباء إعلان الخطوبة من أجل التريند، علقت قائلة: «عرفته عن طريق مذيعة زميلة، وكان بيفكر يدخل الإنتاج كخطوة كويسة وكان بياخد رأيي، ممكن دخل سكة الإنتاج عشان يتعرف عليا صاحبتي قالتلي ينفع عريس، أول مرة أقابله، وبعدها سافر ومتقابلناش والموضوع مكملش».

وأوضحت أنها ما زالت تحتفظ بصورتها مع خطيبها المتوفي، مختتمة: «معلقة صورة خطيبي اللي اتوفى في أوضتي والصالة وفي قلبي، هو الشخص الوحيد اللي أنا حبيته، ودي صورتي معاه كنت بحب حبه ليا وطيبته وحنيته».