جويرية حمدي ترد على منتقديها: مش مسامحة أي حد شتمني وخاض في سيرتي

وجهت الفنانة الشابة جويرية حمدي نجمة ذا فويس كيدز اعتذارًا عن التصريحات، التي نشرتها مؤخرًا وتحدثت خلالها عن فتاوى متداولة بشأن صراخ المرأة أثناء الولادة، بعد جدل الانتقادات التي تعرضت لها.

كتبت جويرية حمدي في منشور عبر حسابها الرسمي بموقع فيس بوك: «أولاً وقبل أي شئ أنا بعتذر لحضراتكم على الفيديو اللي نزلته من يوم، ومش هضيع وقت حضراتكم في تبرير موقفي أو البحث عن أعذار عشان أطلع نفسي على حق، بس صدقوني أنا لما بطلع أتكلم معاكم وأحكيلكم على كل اللي بيخطر على عقلي، مش بيكون في نيتي أي شر وإنما عشان بحب أشارك معاكم وأسمع رآيكم».

وتابعت: «وبالنسبة لآخر فيديو فأنا لما طلعت اتكلمت عن الموضوع ده، كان بسبب إني فعلاً تأذيت بسببه وكنت حاسة أن ده يتعارض تمامًا مع تعاليم ديننا اللي أكرم وأحسن إلى المرأة، عشان كدة مكنتش حابة أن ده يكون شكلنا قدام الغرب وصدقوني وأنتم أعلم مني أن الغرب بالفعل بقى عنده ما يسمي بالإسلاموفوبيا بسبب الأفلام والمسلسلات اللي بتتعمد الإساءة إلى رجل الدين فلما شوفت الكلام ده اللي يصل إلى حد العبث قولت لازم أتكلم فيه وأقول أن ده مش بيمثل الإسلام، ولكن للأسف أنا مكنتش أعرف أن ده أكونت مش حقيقي وأنه الهدف من الأكونت أصلاً هو السخرية من الإسلام بس في نقطة حابة أوضحها لحضراتكم وهو أن حضراتكم بتقولوا أن الأكونت ده كان موجود والناس عارفة قصته وغرضه من 2010 أو 2012».

واستكملت جويرية حمدي: «هل حضراتكم عارفين أنا كان عندي كام سنة وقتها؟! أنا فعلا لسة شايفاه ووالله ما كنت أعرف أن ده أكونت مش حقيقي وأنا مش بقول كدة عشان مقولش على نفسي غلطانة، لا أنا غلطانة فعلا لسببين أولهم إني لم اتحرى الدقة وأبحث وأعرف إذا كان حقيقي أو لا، ثانيًا أن زي ما حضراتكم قولتوا أن في أطفال وبنات صغيرين بيتابعوني ومينفعش أطلع اتكلم في حاجة بغير علم عشان مأثرش عليهم تأثير سلبي بس بإذن الله الموضوع ده مش هيتكرر تاني».

وأضافت: «بس اسمحولي أعاتب حضراتكم عتاب محبة مش كراهية، الناس اللي دخلت خاضت في عرضي وشتمتني أنا وأهلي بأفظع الشتائم هل فكروا في الأذي النفسي اللي حصلي.. كنت أتمنى النصح والتقويم بدون الإساءة إلى أهلي والتجريح فيا وأكيد مش مسامحة أي حد شتمني وخاض في سيرتي وعرضي وأطمع من الله عز وجل أن يغفر لي هذا التقصير وواثقة إن شاء الله ربنا يستجيب فهو من قال في كتابة العزيز ﴿ إِنَّمَا التَّوْبَةُ عَلَى اللَّهِ لِلَّذِينَ يَعْمَلُونَ السُّوءَ بِجَهَالَةٍ ثُمَّ يَتُوبُونَ مِن قَرِيبٍ فَأُولَٰئِكَ يَتُوبُ اللَّهُ عَلَيْهِمْ ۗ وَكَانَ اللَّهُ عَلِيمًا حَكِيمًا)».

واختتمت جويرية حمدي: «أنا بنت عادية جدًا بصيب وأخطئ وعشان أكون صريحة معاكم أكيد في حاجات كثير في تصرفاتي ممكن متكنش أحسن حاجة بس والله بحاول إني أكون أحسن، بس أتمنى إنكم لو شفتم فيا حاجة محتاجة تتحسن أو تتعدل تساعدوني مش تساعدوا الشيطان عليا، حتى النبي عليه أفضل الصلاة والسلام قال لا تكونوا عونَ الشيطانِ على أخِيكمْ.. فياريت لا تعينوا الشيطان على أختكم وإن شاء الله أفضل طول ما أنا عايشة اتعلم وأحسِن من نفسي.. بعتذر على الإطالة بس بجد كان لازم أقولكم الكلام ده وشكرًا».