رانيا يوسف: ضحيت بأدوار بطولة بسبب بناتي والأمهات والحموات سبب المشكلات الزوجية

أثارت الفنانة رانيا يوسف ضجة واسعة وجدلًا كبيرًا خلال الساعات الماضية بسبب تصريحاتها، عن أعمالها الفنية وحياتها الزوجية.

قالت رانيا يوسف عبر تصريحات تلفزيونية: «بنتي الصغيرة بتحسسني بتقصيري إني مقعدتش معاها كتير وأنا صغيرة بسبب انشغالي في الشغل، وضحيت بأدوار بطولة عشان أنا الأم والأب ولازم أصرف على بناتي».

تصريحات رانيا يوسف عن بناتها

وتابعت: «مش بفكر في نفسي ومصاريفي وبناتي أهم وده عطلني فنيا كتير، وساعات بقبل أدوار مش هتضيفلي عشان الفلوس وأعرف أصرف عليهن، وبقول لبناتي مفيش جواز غير بعد سن الثلاثين».

واستكملت رانيا يوسف: «لو حد بيخوني بعرف من غير ما أدور وراه وربنا بيبعتلي إشارات وببقى حاسة من البداية، والأمهات والحموات سبب المشكلات الزوجية ومكنتش بسمح لأمي تتدخل في حياتي».

تصريحات رانيا يوسف عن سبب المشكلات الزوجية

وأضافت: «نسبة كبيرة من المشاكل الزوجية سببها الأمهات والحموات لاختلاف المفاهيم بين جيل الأم والبنت، وكنت مانعة تدخل أمي في حياتي وبيتي، وكانت بتزعل مني لأنها اتربت بطريقة مختلفة ودلوقتي مش هفرض على بناتي حاجة أنا اتربيت عليها، واحتياجي للحب لسة زي ما هو، ولحد دلوقتي من سنتين مقابلتش حد دخل حياتي، وفيه معجبين كتير في حياتي والشهرة بتجذب عرسان كتير بيكونوا عايزين يكملوا الصورة الخارجية بارتباطهم بالفنانة».

واختتمت رانيا يوسف حديثها: «و90% من أسباب الطلاق في مجتمعاتنا الشرقية سببها الأم، لو أم البنت فهمتها معتقدات غلط، أو البنت بتسمع كلام أمها سواء صح أو غلط، ومش بتحاول تشغل دماغها، أو اتربت بطريقة تربية الأم في وقت مختلف، وحصلت مشاكل مشابهة مع حماتي والجوازة ما أخذتش 4 شهور بسببها».

رانيا يوسف