سيدة تستغيث: طليقي أوهمني إن ابني مات.. وحرمني منه 9 سنين.. فيديو

تحدثت سيدة تدعى سحر، عن واقعة مأسوية بعد حرمانها من طفلها بسبب طليقها، وإخفاءه عنها لمدة 9 سنوات، موضحة أنها طليقها أخذ منها طفلها بعد 35 يوما من الولادة.

وقالت سحر، خلال لقائها مع الإعلامية نهال طايل ببرنامج تفاصيل المذاع على قناة صدى البلد 2، إن طليقها لم يقم بتسجيل طفلها في شهادة الميلاد إلا بعد 3 سنوات من الولادة بنفس تاريخ الولادة الأساسي ولكن بعد مرور 3 سنوات، معلقة: عمل كدا عشان افتكر إن إبني مات ومطالبش بأي نفقات وماخدهوش.

وتابعت: أنا شغالة في التموين، ولما حكيت لمديري اللي حصل معايا قرر يساعدني، وجابلي بيانات تثبت إنه اتسجل له شهادة ميلاد ووقتها رفعت قضية ضد طليقي.

وذكرت: هو طلقني غيابي، وسبب طلاقنا تلاكيك بعد ماطلبت منه يروح معايا للدكتور عشان الخلفة، كنت مجوزة من 5 شهور وحصلت المشكلة دي.

وأردفت: أنا اتجوزت واطلقت في 9 شهور، وأبويا وأمي ماتو في 3 شهور ورا بعض بسببه، وهو مفيش عنده رحمة، مش عارفة السبب الي يخليه يعمل معايا كدا، ولا شكاوى ولا مسئولين ولا حاجة نافعة معاه.

وأوضحت سحر: أنا حاليا عايشة في المعادي مع أخويا وبجوار شغلي، ومينفعش أقعد في البلد لوحدي، كنت بطلب إني أشوف ابني بس، أخواته محدش حل بنا.

وتابعت: أخوات طليقي هما اللي بيربوا ابني، طليقي اتجوز من 4 سنين، وأنا متجوزتش ومش قادرة أخد أي خطوة غير ابني بس، تفكيري كله في ابني.

وأوضحت: لو قعدت في البيت ممكن يحصلي حاجة ممكن أموت نفسي، مش عارفة أشوف ابني مش عارفة أوصل لصورة ليه، جوايا نار بركان لو انفجر مش عارفة ممكن يحصل ايه، مش عارفة أيه الإجراءات اللي اعملها عشان أرجع أبني.

وأضافت: بعد ولادة ابني روحت لطليقي أقوله أنت عايز تطلقني ليه.. طردوني من على الباب، أنا معملتش حاجة، أنا قولت لأخته أنا مكملتش عندكم 6 شهور أنا عملت أيه عشان اتطلق.. قالولي الموضوع بالنسبالنا انتهى.

https://www.youtube.com/watch?v=Xngz7657bz4