عايدة رياض: تمنيت الرقص في الفنادق وتزوجت محرم فؤاد بالعند في نجم زملكاوي

كشفت الفنانة عايدة رياض أسرار من حياتها الشخصية لأول مرة، قائلة: «الرقص الشرقي مش عيب خالص وكنت أتمنى أرقص في الفنادق لأني متمكنة وبحب اللي بيرقصوا».

وتابعت الفنانة عايدة رياض في تصريحات تلفزيونية لها: «لكن الظروف زمان ماكنتش مناسبة ومنعتني من تحقيق رغبتي.. لما كنت صغيرة وفي بداياتي اتعرض عليا أرقص شرقي في الفنادق ولكن الظروف الأسرية منعتني.. أخويا توفى بالسرطان وأنا كنت مريضة بنفس المرض قبل منه».

مرض عايدة رياض

وتحدثت عن فترة مرضها، قائلة: «أصيبت بالسرطان في 2015 وهو عانى من سرطان الدم في 2016 وتوفى، ولما اتقال ليا إني مريضة سرطان اتخضيت وبعد 3 سنين من الشفاء أعلنت تجاوز محنة المرض، أنا كنت عارفة إني خلاص هرحل وأتوفى علطول بسبب المرض بس ربنا أعطاني سكينة ورضا وقناعة وفي الفترة دي قربت أكتر من ربنا».

واستكملت الفنانة عايدة رياض قائلة: «بعد ما تجاوزت المرض حسيت بنوع من الزهد في الحياة»، وفيما يخص حياتها العاطفية، قالت: «كنت مرتبطة بنجم زملكاوي كبير وجمعتنا قصة حب، بس كان فيه مشاكل من ناحية أهله لإنهم مكنوش عايزين الجوازة، واتجوزت محرم فؤاد كيدًا وغيظ فيه».

عايدة رياض ومحرم فؤاد

عايدة رياض ومحرم فؤاد

وقالت عن محرم فؤاد: «بعد 6 شهور من زواجي منه حبيته جدًا بس في الأول مكنتش بحبه واتطلقت منه بعد زواج استمر 13 سنة، بس بعد 4 أو 5 سنين كان فيه فترة انفصال لأني كنت عايزة أرجع الشغل وهو كان رافض وبعدين قبلت وقعدت في البيت».

وأضافت عايدة رياض قائلة: «بعدين لما مخلفتش زهقت وبقى عندي ملل فقررت اتطلق بشكل نهائي، علشان أرجع لمتعتي التمثيل، ومحرم فؤاد ضربني علقة ساخنة في لندن خلال فترة الخطوبة بعد ما سمع مكالمتي لطارق اللي كنت بحبه، وسمعني وأنا بقوله مش طايقة أكمل مع محرم».

تصريحات عايدة رياض

وقالت أيضًا: «وسمعني قلتله ياريت نرجع لبعض وأنا بحبك، ولكن بعد ما ضربني تجاوزنا المشكلة وفضلت مراته قبل أن يطلقني بشكل نهائي بعد 13 سنة زواج».

وأشارت الفنانة عايدة رياض إلى أن الفنان محرم فؤاد منعها من التمثيل والعمل بالوسط الفني لمدة 10 سنوات، معلقة: «جالي فيلم الغول مع عادل إمام، وبعتلي الفيلم لحد البيت وماقبلتش الراجل، محرم مشاه على طول».

عايدة رياض ومحرم فؤاد

عايدة رياض