كريم فهمي: وقفت مسلسل بسبب «وتقابل حبيب» وبعتز بلقب طبيب الأسنان

كشف الفنان كريم فهمي عن مشاعره المتباينة تجاه نجاحه في مسلسل وتقابل حبيب، مؤكدًا أنه ظل يشعر بالقلق طوال عرض الحلقات، ولم يطمئن إلا بعد انتهاء الحلقة الأخيرة.

قال كريم فهمي عبر تصريحات تلفزيونية: «فضلت طول الوقت قلقان.. رغم النجاح مع تصاعد الحلقات، ومقدرتش أستمتع فعلاً إلا لما خلصت الحلقة 30، عشان أبقى مطمن».

أعمال كريم فهمي

وتابع أنه كان يعمل على مشروع درامي آخر، لكنه قرر التوقف عنه مؤقتًا للتركيز على شخصية فارس أبو العزم في مسلسل وتقابل حبيب.

واستكمل كريم فهمي: «رجعت بعد كده أكمل المسلسل التاني وأنا بقول لنفسي: لازم أشتغل ضعف المجهود عشان أحافظ على النجاح اللي حققته.. وده ممكن يكون السبب إن خطواتي أبطأ من غيري شوية، النجاح لحظة وخلاص.. بحمد ربنا كتير، لأنه إداني أكتر من تعبي، أنا اشتغلت وتعبت، بس اللي حصل ده كرم من ربنا مش شطارة مني، وكان ممكن مفيش حاجة تنجح خالص، ودائمًا بقول لنفسي: الحمد لله، أنت ناجح.. أسكت بقى واشتغل على اللي جاي.. النجاح بييجي بقلق لأن اللي جاي لازم يكون أحسن».

تصريحات كريم فهمي

كما أكد الفنان كريم فهمي أنه لا يشغل باله كثيرًا بفكرة البطولة أو حجم الدور بقدر ما يهتم بجودة العمل ومدى اقتناعه بالدور، مؤكدًا أن الحب الحقيقي للمهنة هو المحرّك الأساسي له في اختيار أعماله الفنية.

وقال أيضًا: «أنا سهل جدًا ممكن أكون بطل في مسلسل، وأطلع ضيف شرف في مسلسل تاني.. لو دور صغير عجبني ومعنديش أي مشكلة، المهم أحافظ على قيمتي الفنية والأدبية، وموضوع ظهوري كضيف شرف في مسلسل إش إش بدأ باتصال من المخرج محمد سامي، قالّي عايزك معايا ضيف شرف.. قلتله على طول: حاضر يا سمسم، أنا معنديش حسابات البطولة والنجم الأول.. أنا .. أنا بشتغل علشان بحب الشغلانة مش علشان شهرة وخلاص».

واستكمل كريم فهمي: «مش لازم أبقى الاسم الأول، ومش بقول كده علشان مش مهم.. لأ بس لو حسبتها كده مش هنجح، لأن النجاح بالنسبالي مش مربوط بالتصنيف، هو مربوط بالراحة الداخلية والشغف اللي بيخليني أشتغل، مايهمنيش أكون اسم أول ومش معنى كده أنها مش مهمة بس لو حسبتها بالطريقة دي مش هنجح لاني عارف نفسي أنا مش بكتب فيلم غير وأنا مبسوط.. مش بعمل حاجة غير لو حسّيت إني عايز أعملها.. وبحبها دي مش بس شغلانة، دي حاجة بحبها».

وأشار إلى أنه لا يهتم بالألقاب، موضحًا أن اسمه فقط يكفي كشخص عادي، مضيفًا: «أنا بحب لقب طبيب أسنان وبعتز بيه جدًا.. حسيت إنه أفادني في شغلي كفنان، لأن الفنان هو حصيلة كل التجارب والخبرات اللي مر بيها في حياته، وده كله بيتخزن وبيطلع في شكل فن صادق».