«لو حصلي عاهة هعتزل».. أحمد زاهر يكشف كواليس سقوطه في حفل تامر حسني

تحدث الفنان أحمد زاهر عن دور زوجته هدى في نجاحه، والسبب وراء تفكيره في الاعتزال.

قال أحمد زاهر عبر تصريحات تلفزيونية: «هدى أحلى حاجة في حياتي، لما أكون عصبي جدًا وهبوظ الدنيا في حاجة تهديني، من كام سنة كده كنت أنا بصور فيلم اسمه زنزانة 7 أكشن».

وتابع: «في الفتره دي تامر حسني صاحبي جدًا كلمني وقال لي يا زيزو ما تيجي تقدم الحفلة بتاعتي قلت له طبعًا ورحت وقدمت الحفلة ومأخدتش بالي أن في فتحة في المسرح».

واستكمل أحمد زاهر: «ولما طلعت اتخضيت من جمهور تامر بسم الله ما شاء الله الله أكبر ناس كتير قوي فأنا اتخضيت، إحنا لما بشوف جمهور مثلا في المسرح بيبقى 1000 ده أكبر مسرح أنا شايف آلاف عيني مش عارفة تجيب آخر الناس وماشي مش واخد بالي وكان في مربع كده مفتوح تقريبًا تامر هيطلع منه».

وأضاف: «وأنا بقدم رحت واقع فطبعًا كان في مسافة فكعبي اتكسر الحتة اللي ماسكة وتر أكيلس، مش قادر أوصف الألم كان إزاي وقتها وطلعت وكملت وقدمت الحفل وبعدها طلعت جري على المستشفى وهو خلص يا حبيبي حفلته وجالي على طول على المستشفى هو وبسمة وقعدوا معايا لأن كانت صعبة قوي».

وقال أيضًا: «أنا كنت عارف أن الحاجات دي ممكن تخلي الواحد يمشي بزكه طول حياته أو يبقى في رجل أقصر من رجل أو حاجه زي كده، وأنا طبعًا خدت مسامير وشرايح وعملية يعني ضخمة وعندي فيلم بيتصور وقعدت 8 شهور في الجبس وحوالي 8 شهور تانيين علاج طبيعي وفي لحظة قلت لهدى أنا لو حصل حاجة في رجلي ومابقتش أمشي طبيعي هبطل تمثيل لأن هتجاب بقى في دور لما يبقى عندك كاركتر عنده عاهة مش هبقى ممثل بقى فهبقى بمشي وأنا بزك مش هحب أشوف نفسي يعني وهتبقى تريقة على السوشيال ميديا الناس اللي ما بتسيبش حد في حالة».

واختتم أحمد زاهر: «فقلت لها لا مش هقدر وأنا بحب التمثيل قوي أنا التمثيل بالنسبة لي مش نجومية ولا شهرة ولا فلوس ولا الكلام ده خالص أنا أعلى ساعات النشوة اللي بحس بيها في حياتي لما بكون كاميرا بتصورني وإضاءة في وشي وأنا متقمص شخصية غير شخصيتي وبعمل مشهد حلو، ممكن بالنسبة لحد تاني بيتفرج علينا إيه التفاهة اللي بيقولها دي بس يعني براحتكم بس أنا ده إحساسي وده اللي أنا بحبه، بتعب قوي في الدور عمري في حياتي ما مثلت دور كده اللي هو يلا بينا لما دور ده لازم مذاكرة وإزاي هغير وإزاي هعمل ولو فيه جانب نفسي أروح لدكتور، هدى دايمًا معايا وبتدعمني وأي نجاح هي سببه».