مخرج الفيلم القصير «من جوه»: أحداثه تدور عن الجمال الداخلي وواجهنا صعوبة في التمويل بالبداية.. حوار

حصل الفيلم المصري القصير من جوه للمخرج رامي الجابري على إشادة كبيرة خلال عرضه في برنامج نادي السينما الذي اقيم في دار الأوبرا المصرية منذ أيام، وذلك بعد عرضه في 50 مهرجان سينمائي وحصوله على العديد من الجوائز.

موقع قناة صدى البلد، أجرى حوارًا مع المخرج رامي الجابري للحديث عن فيلمه القصير من جوة. إليكم نص الحوار.

أحد المواقع تحدثت عن احتياج الفيلم المادي حيث لم يكتمل.. هل هذا الخبر صحيح؟

الخبر به شيء من الصحة، اي فيلم محتاج تمويل عشان يتم انتاجه كان فعلًا في صعوبة في تمويل الفيلم، وفي الوقت ده كان في مسابقة على موقع للتمويل عن طريق الجمهور والفيلم فاز فيها وقدرنا نلم مبلغ كبير مكنا اننا نقدم الفيلم بأفضل مستوى.

لماذا فيلمك تدور أحداثه حول فكرة الجمال الداخلي؟

الجمال في حد ذاته نسبي والأهم من الجمال هو التقبل والتعايش مع فكرة التقبل بتشغلني في العموم ، واللي مش بقدر استوعبه هو الرفض عموما أو افسره وبشكل ما بحس إني محتاج اشرح نفسي للناس عشان يتقبلوني ومع الوقت فهمت إن دي مشكلة عند الناس كلها والأفضل إن الإنسان يكون هو مقياس لنفسه والا هيفضل طول الوقت بيسعى للقبول المجتمعي ومش هيحصل عليه.

كيف كانت تجربتك الإخراجية بشكل عام؟

كانت تجربة مختلفة خصوصًا في تسكين الأدوار وإني اقدر اقنع حد بالتجربة زي بطل الفيلم كانت صعبة و غريبة وفيها توفيق من ربنا، الحاجة التانية وجود حد بخبرة نزار شاكر في التصوير اضافتلي كتير جدًا وأضافت للفيلم، والفيلم على المستوى العام حقق المطلوب منه واكتر، وشارك في قرابة خمسين مهرجان وفاز في 11 منهم ، فانا كمخرج للعمل سعيد بالتجربة جدًا.

هل كنت مقرر منذ البداية أن تكون مدة الفيلم بهذا القصر خمس دقائق فقط؟

الملل هو عدو أي فيلم فالغرض الأساسي للفيلم قبل أي شيء هو التسلية والترفية وبعد كدة القصة ومضومونها وده بيتظبط من الإيقاع اللي بشتغل عليه من أول الورق لحد المونتاج فأي حاجة مش بتضيف للقصة بتتحذف وبيتطلع العمل في اقصر صورة لأنها بتكون دي النسخة الأكثر كمالا.

هل تستعد لإخراج فيلم جديد؟

حاليا أنا في منتصف تصوير مسلسل كابتن شديد، بتقنية الاستوب موشن وصورنا 30% من المسلسل ولسه بنصور وهيكون جاهز علي أخر السنة إن شاء الله.