مصطفى قمر يحسم جدل علاقة عمرو دياب بتسمية ألبومه الجديد

تحدث الفنان مصطفى قمر عن سر تسمية ألبومه الجديد «قمر قمرين»، وأوضح أنه أهدى الأغنية للهضبة عمرو دياب.

وتابع مصطفى قمر عبر تصريحات تلفزيونية: «عمرو دياب فعلًا عنده أغنية اسمها قمر، وأغنية تانية اسمها قمرين، وأغنية قمر كانت حلوة أوي وبيقول روحك حلوة وعنيك حلوة.. ده أنت بتغنيها ليا بقى يا عمرو».

سر تسمية ألبوم قمر قمرين

واستكمل: «وعملت عليها فيديو وهو شافه ولما اتقابلنا جاملني وقالي أنت نجّحت الأغنية، فقولتله أنا هعملك أغنية قمر قمرين».

وكشف تفاصيل تحضيره لفيلم سينمائي جديد، قائلًا: «أواصل التحضير لفيلم جديد بعنوان صديق العيلة، من تأليف زينب عزيز وإخراج علي إدريس، وسعيد بالتعاون معهم مرة أخرى خاصة بعد النجاحات التي حققناها معًا».

كواليس أعمال مصطفى قمر

وكشف مصطفى قمر كواليس فيلم الحب الأول، واستعاد ذكريات العمل، قائلًا: «ساندرا نشأت كانت هي اللي هتخرج فيلم الحب الأول وكريم عبدالعزيز كان مكان طارق لطفي واعتذروا قبل الفيلم بوقت قليل جدًا، كريم قالي أنا مش هقف قدامك عشان هتكره أنا هطلع شرير وأنت محبوب وأنا احترمته أما ساندرا نشأت كانت مش مندمجة مع السيناريست وحصل خلاف، أتحطيت في موقف صعب كنت بدور على بطل ومخرج».

واستكمل: «جبت المخرج حامد سعيد كان مخرج فيديو كليب كان عاملي كليب وده أول فيلم له، وجبت طارق لطفي رحت له حكيت له الفيلم وطلبت منه يمضي على طول، منى زكي وحنان ترك كان في بينهم تنافس لما رحت لحنان وإحنا بنتفق قالت عايزة تعرف اسمها هيتكتب إزاي في الأفيش سألتها إنتي عايزة إيه قالت أنا عايزة أبقى بعديك على طول قلتلها هكتب اسمك قبل اسمي».

وأضاف: «منى زكي هي رقيقة وحساسة جدًا كانت اتخانقت مع المنتج هاني جرجس لأنها نزلت متأخر شوية وقال مش هيصور الكوبليه بتاعها في الأغنية عشان مش عايز يدفع فلوس يوم تاني، قلت أنا هصورها على حسابي وقعدنا يوم على حسابي عشان نصور الكوبليه بتاعها».

ظهور زوجة مصطفى قمر في أحد أعماله

كما كشف مصطفى قمر كواليس الظهور الأول لزوجته في أحد أعماله الغنائية، مؤكدًا أنها شاركته بطولة فيديو كليب أغنية «مش هشوفك» للمرة الأولى.