معتز حسين: أهلي مدعموش دخولي التمثيل في البداية| فيديو

كشف معتز حسين تفاصيل بداية مشواره الفني، وموقف أسرته من دخوله مجال التمثيل، بجانب عمله في أكثر من مجال خارج الفن.

تحدث معتز حسين خلال استضافته في برنامج سبوت لايت، الذي تقدمه الإعلامية شيرين سليمان على قناة صدى البلد، عن رحلته مع التمثيل ورد فعل أسرته تجاه اختياره، وقال: "أهلي مكنش في دعم منهم ليا إني أكون ممثل، مع إن عيلتي كانوا متفتحين وعادي أعمل اللي أنا عايزه وادرس اللي أنا عايزه، وكنت بلعب رياضة ومحدش كان بيتدخل في حياتي خالص".

وأضاف: "لما قولتلهم إني عايز أدخل معهد فنون مسرحية، مكنتش لاقي الدعم اللي مستنيه، عكس لما دخلت بيزنس وماركتينج لاقيتهم دعموني أكتر".

واستكمل معتز حديثه، قائلًا: "هما مكنوش معترضين على التمثيل، لكن مكنوش بيدعموا، وكانوا دايمًا بيقولولي شوف لو متوفقتش هتعمل إيه".

وأردف كلامه: "خلصت الأربع سنين بتوع الجامعة، وبعدها بدأت آخد ورش تمثيل، وكمان جنب التمثيل بشتغل في العقارات من زمان، وفتحت شركة صغيرة، وبشوف أي شغل أشارك فيه".