«مقطوع».. أول رد من كامل الوزير لـ أحمد موسى على فيديو المهندس صاحب واقعة ديروط

رد وزير النقل، الفريق كامل الوزير على فيديو المهندس صاحب واقعة ديروط.

و قال أحمد موسى عبر برنامج على مسئوليتي المذاع على قناة صدى البلد: قلت للفريق كامل الوزير إيه الموضوع بتاع الناس متداولة؟ قالي هما الناس تداولوا حاجة وما تداولوش اللي بعدها، الموضوع فيه جزئين جزء أولاني وجزء تاني، اللي عايز يتداول الجزء الأولاني يتداوله، قالك الحق الفريق كامل الوزير المهندس اللي كان بيشرح وعملوا وعملوا معاه وعمل كذا وعمل وعمل جميل، لكن في بقية للحكاية محدش قربلها خالص.

وتابع قائلا: الفريق كامل وأنا من أكتر الناس اللي عملت معاه جولات، يعني أكتر برنامج وأكتر حد نزل معاه العبد لله، هذا الرجل اللي أنا بحضره دايماً بيخلي المهندسين يشرحوا الشباب، دايماً في كل المشروعات لدرجة إنه في أحياناً وإحنا مع بعض يقول هاتوا المهندس اللي هناك ده أنا عاوزه يشرح، فحد يقوله يا فندم ده مش يقوله أنا عاوزه يشرح عشان يتعلم، ده قدامي أنا في حلقات كتيرة جداً، فبيحب ولاده اللي معاه المهندسين في وزارة النقل يتعلموا، يشرح لأنه لازم يدربهم على كل حاجة.

وأضاف موسى: الفريق كامل الوزير مش محتاج شهادة حد، ده وزير بيشتغل 30 ساعة في الـ 24، كامل الوزير تاني بقول بيشتغل 30 ساعة في الـ 24، ده راجل عمله لمصر عمل إنجازات هائلة، كل الدنيا بتشهدله لأنه شغال، والفريق كامل الوزير معندوش النص نص، بيحب تاني الشغل بتاعه يبقى 100%.

وواصل قائلا: الفريق كامل الوزير مفيش مشروع ميعرفوش، ده اللي بيختار المسارات، ده بينزل في الجبال عشان يختار مسارات القطارات السريعة والمونوريل والـ LRT، هو اللي بينزل بنفسه، أسهل حاجة يعمل إيه؟ كل واحد في القطاع بتاعه، اللي في قطاع أسيوط يختار المسار وسوهاج يختار، وبينزل 27 محافظة، أه بينزل من أول أكتوبر لحد أبو سمبل أنا شاهد على ده، يختار مسارات في إيه؟ درجة حرارة 50 لا تراجع كامل الوزير، وفي عز البرد والثلج ينزل لأنه راجل شغال بيشتغل.

واختتم أحمد موسى: وزير النقل مضغوط؟ طبعاً جداً جداً، في مشروعات وشغل عندنا شغل في سوهاج وكم افتتاحات شغل ده جهد سنين عمل، افتتاحات أنا اللي أعرف يعني إيه محور بيتفتح عندي في الصعيد.