نادر نور: أغنية لو على قلبي عذبتني 4 سنوات.. وحلمت بإليسا تغني «لو تعرفوه»

تحدث الملحن نادر نور عن استغاثته من قلة العمل، وتجاهل بعض الفنانين لرسائله، كاشفًا كواليس أشهر أعماله وهي أغنية لو على قلبي للفنان اللبناني فضل شاكر، وكواليس أغنية لو تعرفوه للفنانة اللبنانية إليسا.

قال نادر نور عبر تصريحات تلفزيونية، إن المزيكا تستطيع أن تؤثر في المتلقي بشكل كبير بسبب سرعة انتشارها، مضيفًا: «أغنية لو على قلبي عذبتني قعدت 4 سنين، وعلمتني الصبر وراحت لشعراء كتير ومتكتبتش، وبدأت أسمع الأغنية لمطربين وكل واحد كان ليه تعليق أنها طويلة ونقص من الكلام أو اللحن».

كواليس أشهر أغاني نادر نور

واستكمل: «لغاية ما وصلت لمرحلة أن الأغنية دي وحشة، لغاية ما قعدت مع فضل شاكر وسمع أغاني كتير معجبتهوش لغاية ما سمع لو على قلبي، وبدأ يغنيها معايا وقرر ياخدها وفضل كان جاي من نجاح كبير جدًا، وأنا مكنتش مصدق وقلت معقولة يشتري أي حاجة؟».

وأضاف نادر نور: «بعد شهرين كلمني من تونس وتفاجئت أنه سجل الأغنية وهينزلها لوحدها بكليب، لقيت نفسي عايز أقوله أنت ليه بتعمل كده؟، قولتله راجع قرارك وفرحت جدًا لما نزلت وكسرت الدنيا، ربنا بعتلي بيها رسالة اسمها الصبر، وجملة وفكروه فاتني وبستناه وكمان بقى عرفوه من فات حبيبه تاه، من أغنية لو تعرفوه، حلمت بإليسا بتغنيها، وصحيت كتبتها ولحنتها، والشاعر نادر عبدالله غير كلماتها».

وتابع: «المزيكا أخطر أنواع الفن لأنها بتنتشر بسرعة جدًا، وهي أكتر حاجة بتأثر في الناس من غير ما تشوفيها، والملحن معندوش أي آلة يبدأ منها، ممكن كلمات حزينة بتتلحن رقص زي أغنية أشوف فيك يوم بتاعة عبدالفتاح الجريني، كنت بستغرب أوي أنها بتشتغل في أماكن سهر كتير الناس من كتر ما هي حزينة بتقوم ترقص».

وقال أيضًا: «بشكر المستشار تركي آل الشيخ على استجابته ليا وثقته فيا، وحصل التواصل بينا، واللي جاي خير إن شاء الله، ولما نزلت البوست كنت واصل لمرحلة صعبة جدًا».

حقيقة خلاف نادر نور ورامي صبري

ونفى نادر نور وجود خلاف سابق مع المطرب رامي صبري، معلقًا: «هو فنان كبير وأقدره وأحترمه كثيرًا، وكان يتواصل معي دائمًا بعد كل ألبوم جديد حتى يبارك لي، ولا أعلم لماذا تفاعل مع الموقف ولا أعلم كان يقصدني أم لا، وحتى أنهي المشكلة والجدل قولت للناس خلاص مفيش حاجة، وأنا مش زعلان من أحد».