نشوى مصطفى تعلن تنازلها عن قضية المتحرشين ضد ابنتها

أعلنت الفنانة نشوى مصطفى تنازلها عن قضية المتحرشين ضد ابنتها مريم، ووجهت نشوى الشكر لكل من وقف بجوارها عبر حسابها الشخصي «فيس بوك».

وقالت نشوى، « يوم طويل، فى نهاية اليوم أحب أقدم كل الشكر والامتنان لمعالى النائب العام وللفاضل الاستاذ رئيس نيابة الهرم وللفاضل وكيل نيابة الهرم، بلدنا عظيمة بشرفائها، وشكراً جزيلاً وزارة الداخلية، احنا مسنودين عليكم والله كتر الف خيركم».

وأضافت، «بالمناسبة الطرق الجديدة والكاميرات اللي فى كل مكان على الطرق والملصق الإلكترونى اكتشفت بالبرهان أنهم مش بس علشان يرصدوا مخالفات السرعة الملصق والكاميرات حماية لينا من أي حد ممكن يبلطج، فيه كاميرات بتسجل كل التفاصيل ومفيش أي فرصة لأى بلطجة، بسبب العظمة اللي الطرق بقت عليها الحمد لله تم القبض على العربية باللي كانو فيها فى أقل من أربع ساعات».

وتابعت، «للاسف كلهم سنهم صغير، الهدف اتحقق أنهم هما وغيرهم عرفوا إن مصر اختلفت وكله متسجل وأن عندنا عنين صاحية بتحمينا ومحدش فوق القانون، يمكن اخر سطر ده يزعل بعض الناس اللي طلبو منى انى استمر فى القضية، بس حرصاً على امهات واسر المتهمين وانهيارهم بان ولادهم يتسجنوا، انا وابتغاء مرضاة الله تنازلت عن القضية عملاً بمبدأ العفو عند المقدرة ».

وأكملت، «اللي طلبتو من اهاليهم وهما بيعتذروا لبنتى انهم يربوا عيالهم ويفهموهم معنى الرجولة، وإن اقل عقوبة للمتخرش باللفظ او الاشارات الخادشة للحياة هى خمس سنوات طبقاً لقانون التحرش اللي أمر بتعديله سيادة الرئيس حفاظاً على حق بناتنا، حاجة تانية مهمة مكنتش اعرفه، انا بالمناسبة معملتش محضر، انا بس كتبت بوست هنا، واللي اتحرك بالنيابة عنى كمواطنة مصرية».

واستطردت، «إدارة الرصد والبيان والتوجيه بمكتب النائب العام، ودى إدارة موجودة مخصوص لمتابعة السوشيال ميديا وبيهتموا بأى مشكلة يكتبها اي مواطن وليهم ارقام تليفون نقدر نتواصل معاهم وهما اللي بيقوموا باخطار النيابات المختصة نيابة عن اى مراطن تعرض لمشكلة، وعلى فكرة انا اتنازلت عن الجزء اللي يخصنا لكن حق الدولة مش من حقى اتنازل عنه وهما عندهم مخالفات كتير، تحيا مصر من كل قلبى».

نشوى مصطفى بعد التحرش بابنتها: «خدنا إجراءات ضدهم وربنا يحافظ على ولادكم»

الداخلية تكشف تفاصيل التحرش بابنة نشوى مصطفى وضبط المتهمين