هالة صدقي تكشف سبب عصبية محمد سامي في التصوير

كشفت الفنانة هالة صدقي كواليس التعامل مع المخرج محمد سامي في مواقع التصوير، وردّت على الانتقادات المتكررة التي توجه له بسبب عصبيته، مؤكدة أن هذه العصبية نابعة من حرصه الشديد على العمل وتفانيه في إخراجه بأعلى جودة ممكنة.

وأضافت هالة صدقي، في تصريحات إعلامية، قائلة: "محمد سامي من أفضل المخرجين اللي اشتغلت معاهم في حياتي، لأنه مش بس شايف المشهد، ده شايفه بمونتاجه ومزيكته، وبيبقى عايزك تبقي على نفس مستوى إخلاصه للشغل".

وتابعت حديثها قائلة: "إحنا كنا بنشتغل 12 و14 ساعة في ظروف صعبة جدًا، في أماكن زي السكاكيني وشبرا، في شقق بدون تكييف ودرجة الحرارة 40. سامي ما كانش بيأكل، وخس كتير جدًا، وكان طول الوقت مشغول بالتركيز والتفاصيل الدقيقة".

وأوضحت هالة صدقي، أن عصبيته في اللوكيشن ليست شخصية، بل ناتجة عن ضغوط العمل، قائلة: "هو مش بيزعق كنوع من الاستعراض، هو بيطلب من الممثلين يبقوا على نفس المود والتركيز. يعني لو لقى ناس بتضحك وهو بيحاول يدخل في مشهد صعب، طبيعي يشيط. لأنه عايز الكل يبقى في الجو نفسه".

وأشارت هالة صدقي إلى مدى دقته واهتمامه حتى بأصغر التفاصيل: "مرة وقف تصوير علشان مانيكير مش راكور، وده كان في مشهد متصور من 3 شهور، ولما واجه الممثلة بالملاحظة قال لها: لا ده مش راكور، أنا فاكر. وده مش دور المخرج أساسًا، بس هو حافظ وراعي كل التفاصيل بنفسه".

واختتمت هالد صدقي حديثها قائلة: "الراجل ما عندوش أي طلبات غير إنك تبقي مخلصة زي ما هو مخلص، وتحسي بأهمية العمل زي ما هو حاسس بيها، وده حقه الطبيعي".