هشام إسماعيل: أتمنى تحويل «الكبير أوي» إلى كرتون.. وأعمل مسرح خاص بيا

تحدث الفنان هشام إسماعيل عن نشاطه في تأليف الكتب، وأمنياته خلال المرحلة المقبلة.

قال هشام إسماعيل عبر تصريحات إذاعية: «بكتب سيناريوهات كتير وبعرضها على نجوم وجهات إنتاج، ولكن عملية خروج عمل فني للنور بتخضع لتوفيق ربنا والصدفة البحتة».

تجربة هشام إسماعيل في التأليف

واستكمل: «كتبت حوالي 50 أو 60% من الأفكار والمشاهد في مسرحية قهوة سادة والمخرج خالد جلال كان بيشجعنا على الكتابة والارتجال».

وأضاف هشام إسماعيل: «أصدرت في معرض الكتاب كتاب جديد فيه فيلمين مختلفين عن بعض خالص، فيلم اسمه رحلة سعيدة مليان كوميديا وحدوتة مركبة، وفيلم تانى اسمه من كوكب تاني».

تصريحات هشام إسماعيل

وتابع: «ودمجت الاسمين مع بعض وسميت الكتاب رحلة إلى كوكب تاني.. فكرة فيلم من كوكب تاني بتطرح سؤال: هل الزوج المثالي موجود؟ ولا هو كائن فضائي؟.. نفسي أروح لكوكب فيه ناس منطقية، واضحة مش بتخفي ما لا تظهر، لأني بحب الوضوح في كل حاجة في حياتي».

وفيما يخص مشاركته في مسلسل الكبير أوي، علق قائلًا: «أكتر حاجة حبيتها في مسلسل الكبير أوي إني كنت بعمل حاجة الناس كلها مستنياها، وكنت بحس إني على المسرح أو إن العمل متذاع على الهوا، ونفسي الكبير يتعمل كارتون».

واختتم: «ربنا أكرمني بالعمل مع النجمين يسرا ويحيى الفخراني، والشغل مع يحيى الفخرانى له سحر خاص، والجديد عندي الفترة الجاية أنا ضيف شرف في مسلسل كلهم بيحبوا مودي اللى هيتعرض في رمضان، ومن أحلامي إن يبقى عندي نوع المسرح الخاص بيا اللي بألف فيه وبعمل فيه دور رئيسي، وممكن يبقى معايا بطولة جماعية مختلفة وخاصة بيا زي أستاذ محمد صبحي، الريحاني، فؤاد المهندس».