هشام ماجد يكشف سر خلافه مع أحمد فهمي بسبب «بنات العم»

كشف الفنان هشام ماجد محطات في مسيرته الفنية، من بينها برنامج الفرنجة، قائلًا: «الفرنجة أمتع تجربة صورتها في حياتي، وميزته إن إحنا كنا بنعمله بالروح القديمة بتاعتنا».

وتابع هشام ماجد في تصريحات تلفزيونية له: «اللي هي أول ما بدأنا نمثل، اللي هو لو معرفناش نجيب تصاريح للتصوير في الشارع، هنصور ونوّقف واحد على أول الشارع، عشان لو البوليس جه يعرفنا ونجري».

تصريحات هشام ماجد

واستكمل: «كان في مغامرات كتير في التصوير، ومثلا كنا عايزين في إيطاليا نستحمى في النافورة، ده طبعًا مش مسموح بيه هناك، فهل هنبوظ البرنامج؟.. لأ هننزل ولو البوليس جه هنجري».

وقال أيضًا: «ففي الآخر بعتبره فكرة هادفة جدًا، بيوريك إننا لما بنسافر برا غصب عننا بنحترم القوانين اللي مش بنحترمها هنا».

كما أعرب عن حبه للفنان الراحل سمير غانم، قائلًا: «أستاذ سمير غانم الله يرحمه بالنسبة لنا حاجة كبيرة أوي، نادر لما يكون له حاجة أنا مش حافظها، وكان لينا الشرف إنه وافق يطلع معانا ضيف شرف في أول أعمالنا».

وتابع هشام ماجد: «وقف جنبنا جدًا ومن بداياتنا كان بيتكلم علينا، وبيقول علينا دول مستقبل الكوميديا في مصر، وليا الشرف إن آخر حاجة هو صورها في السينما، كان مشهد في فيلم تسليم أهالي وأنا كنت معاه فيه».

هشام ماجد وشيكو

أسرار هشام ماجد

كما كشف أسرار وكواليس فيلم بنات العم، قائلًا: «فهمي مكنش عايز يعمل دوره في فيلم بنات العم، وكان عايز يعمل دور شاهندة اللي أنا عملته في الآخر، وأنا برضه كنت عايز أعمله ففضلنا قافشين كتير بس في الآخر هو اقتنع وجه على نفسه وعمل دور شوق، بس كان من أحلى أدوار أحمد فهمي».

وقال أيضًا: «لو مفيش رقابة برضه مش هحب أطلع شتايم في أعمالي، أصل في الآخر في أطفال وأُسر بتتفرج عليا، برغم إن لو في شتايم في الأعمال هتضحك أكتر، بس أنت كدة هتخسر جمهورك، وأنا مع وجود تصنيف الرقابة للأفلام للكبار فقط وهكذا».

أما عن مسلسل الرجل العناب، قال: «أنا وشيكو مش بنشارك في فيلم الرجل العناب، أحمد فهمي سألنا بس كان كل واحد مشغول في حاجة فاعتذرنا، قالنا هعمله أنا قولناله أعمله طبعًا، بس أنا عمومًا بقيت بتشائم من الرجل العناب لأننا اتخانقنا مرتين بسببه».

هشام ماجد وأحمد فهمي وشيكو

وأضاف هشام ماجد: «اتخانقنا مرة وهو مسلسل، ومرة لما جينا نعمله فيلم، بنتخانق ونتصالح تمام بس الرجل العناب دايمًا مكلكع، وقبل ما يتعمل مسلسل كان المفروض هيتعمل فيلم وصورنا فعلا يوم من الفيلم ده، وبعدين اتخانقنا ومكملناش الفيلم فعملناه مسلسل، فبالنسبالي خلاص أنا حابه زي ما هو».

وتحدث أيضًا عن تعاونه كمؤلف مع الفنان محمد سعد في فيلم بوشكاش، قائلًا: «أنا وأحمد فهمي كنا كاتبين جزء من فيلم بوشكاش قبل ما نعرف إن محمد سعد اللي هيعمله».

وتابع: «ولما عرفت إننا هنعملهوله، كانت فرحة غير عادية أنا أصلا بحبه ودخلتله فيلم بوحة 3 مرات، وساعتها محمد سعد قالنا الفيلم ده مش هيتكتب كدة، إحنا نطلع إسكندرية وفعلا طلعنا وكان كل يوم يجيبلنا جمبري وسمك ونقعد ناكل ونكتب لحد ما خلصنا الفيلم».

هشام ماجد

هشام ماجد ودنيا سمير غانم

وفيما يخص تعاونه مع الفنانة دنيا سمير غانم، قال: «بعتز بفيلم تسليم أهالي جدًا وبعتز بدنيا سمير غانم، أكتر واحدة بحب نشتغل مع بعض، إحنا أصلا أصحاب فكيميتنا ماشية مع بعض».

واستكمل الفنان هشام ماجد: «بشوف دايمًا إن في أزمة ورق وكتابة، يعني إحنا عندنا ممثلين جامدين ومخرجين بيعرفوا يعملوا كوميدي ودراما، وكمان عندنا مؤلفين جامدين، بس فكرة إنك تلاقي ورق حلو دي بتاخد وقت، وعشان الفيلم يتعمل كويس لازم يتكتب ويتراجع ويتحضرله كتير»، لافتًا إلى أنه لم يكن يحلم بأن يكون ممثلا.

وقال عن بداياته أيضًا: «وقت لما كنا بنعمل رجال لا تعرف المستحيل كنا بنهزر ومكنتش أتوقع إننا نوصل لكل ده، لأن عمري ما كان حلمي إني أكون ممثل.. بس مع الوقت بتكتشف جواك مواهب مكنتش عارف إن هي عندك».

واختتم: «وابتدينا في الجامعة نعمل رجال لا تعرف المستحيل وانتشر جدًا، ومن فيلم للتاني فحبينا الشغلانة وبدأنا نشتغل على نفسنا، وإحنا أول ناس تعمل السينما المستقلة بكاميرا فيديو».

هشام ماجد ودنيا سمير غانم

هشام ماجد