هل اعتزلت ياسمين وافي التمثيل بعد زواجها؟.. الفنانة تحسم الجدل

كشفت الفنانة ياسمين وافي ابنة الفنان ممدوح وافي، حقيقة اعتزالها التمثيل بعد الزواج، خاصةً بعد غيابها من الموسم الثالث من مسلسل موضوع عائلي.

كتبت ياسمين وافي في منشور عبر حسابها الشخصي بموقع فيس بوك: «إلى من يهمه الأمر من متابعين وصحفيين محترمين ردًا على سؤالكم المتكرر بعد ظهور فيديو بتداوله كذا صفحة مجهولة بيتابعهم قرابة المليون followers، بيأكد خبر اعتزالي بعد الزواج وقفلي لمواقع التواصل الخاصة بيا وحاجات تانية كتير بسم الله ماشاء الله كلها غلط ماعدا اسمي أنا وشادي جوزي».

حقيقة اعتزال ياسمين وافي

وأضافت: «أنا مكنتش ناوية أعقب أو أهتم ورفضت نصايح مقربين ليا بعتولي الفيديو وقالوا لازم أنفي موضوع الاعتزال والكلام الوارد في الفيديو.. بس أنا تخيلت أن الخبر مغلوط وساذج بما فيه الكفاية وعبثي بشكل واضح لأي شخص يعرفني أو ميعرفنيش وخصوصًا أني بعد جوازي بأقل من شهر نزلت صورت مسلسل لانش بوكس ونزل فيلم migration اللي دبلجته».

واستكملت ياسمين وافي: «أو وشادي بعد الجواز غير بروفات المسرحية حاليًا فمهتمتش وشوحت بأيدي كده.. لكن للأسف بعد مكالمات ورسايل كذا صحفي أو إعداد برنامج عايزين يستضيفوني عشان يتم تأكيد أو نفي خبر الاعتزال.. اكتشفت أن أصدقائي عندهم حق».

ياسمين وافي

تصريحات ياسمين وافي

واختتمت: «وللأسف أنا فعلاً مضطرة أطلع أوضح الواضح وأنفي خبر اعتزالي بعد الجواز رغم المسلسل والفيلم اللي عملتهم بعد الجواز وأنفي من موقع تواصلي الاجتماعى هذا إني مقفلتش مواقع للتواصل الاجتماعي وأنفي لكل ما ذكر في الفيديو لأنه كله غير صحيح بالمرة ولذلك محبتش أنشره عشان ما ميشوفهوش عدد أكبر وهكتفي أني أنشر screen له.. وscreen لصفحة من اللي بينشروا الفيديو وأتمنى نعمل اللازم معاهم ونفهم إيه بقى مصدر العبث ده ولكل من صدق هذا الهري: shame on you اعتزل إيه هو أنا بدأت أصلا».