هيدي كرم: دراسة الجامعة شبه رغباتنا الحقيقية أما الثانوية العامة مش مقياس لنجاحك

كشفت الفنانة هيدي كرم ذكرياتها مع الثانوية العامة، وحصولها على مجموع عالي رغم خروجها وممارستها للرياضة.

قالت هيدي كرم عبر تصريحات تلفزيونية عن ذكرياتها مع الثانوية العامة: «كنت بعمل كل حاجة بخرج وبتفسح وبلعب رياضة وبذاكر وبنجح بنمر كويسة وشاطرة في تنظيم وقتي».

ذكريات هيدي كرم مع الثانوية العامة

وأضافت: «ولحد دلوقتي الراهبات بيحبوني لأني كنت تلميذة مش مشاغبة وهادية وملتزمة وشاطرة ووالدتي هي اللي علمتني إدارة الوقت وإزاي أنظم مذاكرتي وكانت بتعمل لي جدول قبل الامتحانات بشهر وتقسم لي الأيام».

وتابعت هيدي كرم قائلة: «جبت 89% ودخلت إعلام، لكني لما اتخرجت من المدرسة كنت 16 سنة يعني صغيرة أوي وكنت منغلقة في مدرسة الراهبات ولما روحت إعلام وجامعة القاهرة لقيت الموضوع فوق قدراتي وحولت تجارة فرنساوي وبعد شوية ذاكرت حاجات لها علاقة بالإعلام وخدت ورش تمثيل لمدة 9 أشهر ودرست الاتنين بشكل حر مش بشكل أكاديمي».

هيدي كرم

تصريحات هيدي كرم

ووجهت نصيحة للطلاب، حيث قالت: «متستكتروش مجموعكم لو كبير وادخلوا الكلية اللي أنتم بتحبوها.. وأنت جبت مجموع لأنك ملتزم وشاطر وحصل توفيق لكن دراسة الجامعة بتكون شبه رغباتنا الحقيقية وهترسم جزء كبير من مستقبلنا المهني أما الثانوية مش مقياس لنجاحك ومدى أهميتك كإنسان وشخص».

واختتمت هيدي كرم: «لأن كتير أوي من الناس الناجحة على مستوى العالم مكانوش شاطرين في الدراسة، ولذلك هي مش نهاية الدنيا ومش تقييمك كإنسان».

هيدي كرم