بعد أزمة أغنية كنا صغيرين.. هيثم نبيل يحسم الجدل ورامي جمال يعتذر: «غلطة غير مقصودة من ورثة رحيم»

حسم الملحن هيثم نبيل الجدل المثار حول أغنية كنا صغيرين، التي طرحها الفنان رامي جمال ضمن ألبومه الجديد.

كتب هيثم نبيل في منشور عبر حسابه الرسمي بموقع فيس بوك: «منعًا للغط وكلام كتير بيتبعتلي النهاردة سواء من جمهور أو من صحفيين، هى فعلًا أغنية كنا صغيرين بتاعتي في ألبومي الأول (كملنا بعض) ده مش تشابه، لكن ده لحن مختلف غير لحني اللي كنت عاملها بيه».

وتابع: «الموضوع إن فنانين كتير حابين يخلدوا ذكرى أخونا الغالي محمد رحيم، فبيسمعوا أغاني من خلال زوجته، وصادف إن الأغنية دى من أرشيف أغاني رحيم الله يرحمه اللي منزلتش، وهو كان لحنها زمان قبل ما أنا أخد الكلام وألحنها وأنزلها في ألبومي الأول وأنا شايف إن ده هدف محترم من صديقي رامي جمال، وخصوصًا إني اتفاجئت إن المؤلف توفاه الله».

واستكمل هيثم نبيل: «وأنا أكيد سعيد إن ألحان محمد رحيم تفضل موجودة بيننا.. مبروك يا رامي الألبوم وإن شاء الله يكسر الدنيا، وربنا يرحم محمد رحيم والشاعر خالد أمين، ورامي تواصل معايا والموضوع حصل بمنتهى الود، وعشان مش حابب إن حد يصطاد في الماية العكرة».

واختتم: «إحنا في الآخر بنقدم فن يبسط الناس مش بنحارب، وفي حاجات تانية أهم إنسانية تستدعي التجاوز عن التفاصيل الأصغر».

ورد الفنان رامي جمال على هيثم نبيل، قائلًا: «شكرًا حبيبي إنك فهمت الموقف وليك كامل الاحترام، وهى غلطة غير مقصودة من ورثة الغالي رحيم».

وأضاف: «والحمدلله إنها جت مع شخص محترم زيك، ورغم كدة مشيت قانوني وخدت إذن منك ومن الجمعية بإعادة النشر تاني، وكله يهون عشان خاطر رحيم وجماله وخالد وورثته، وشكرًا يا هيثم على أدبك وذوقك، مش غريب عليك».