أبرز تصريحات حورية فرغلي.. اتعملي عمل بعدم الجواز والخلفة

إسماعيل هاني 05 مارس 2023 | 02:08 مساءً

كشفت الفنانة حورية فرغلي، عن تفاصيل عديدة في حياتها منها مرضها والعمليات التي خضعت لها بسبب مشكلة أنفها والسحر الذي تعرضت له بعد مسلسل ساحرة الجنوب.

نستعرض لكم أبرز تصريحات حورية فرغلي في التقرير التالي:

قالت حورية فرغلي: من سنتين كنت عايزة أموت لأن كان فيه كورونا والدكتور اللي ممكن يعالجني كان موجود في أمريكا والسفارات كلها كانت مغلقة.

عملت 27 عملية جراحية في 8 سنين وطلعت من تجربة المرض متلغبطة وجالي اكتئاب حاد وكنت حاسة إني في منطقة سودة.

حلم حياتي تقديم جزء تالت من مسلسل ساحرة الجنوب وأقدم دور حتشبسوت والأميرة ذات الهمة.

في وقت مكنتش عارفة أبص في المرايا ولا استطعم الأكل ولا أشم أي ريحة وبالنسبالي مكنش فيه فرق بين العيشة والموت.

بقيت أحمد ربنا على أي حاجة والحمد لله على شكل أنفي وأي حاجة ربنا عملها فيا وفي الفترة اللي فاتت حاولت أتقرب من ربنا وأصلي واقرأ قرآن.

أخويا كان واقف معايا في كل خطوة وفي الأزمات مفيش أقرب من الاخوات لأن هما عيلتنا.

اكتشفت إن معمول لي عمل بعد مسلسل ساحرة الجنوب ولقيته في البيت مكتوب فيه حورية تصاب بالشلل والمرض ويقف جوازها وخلفتها ورزقها.

كنت بتعب من غير سبب ووزني وصل 49 كيلو ومش باكل واكتشفت في الآخر إنه سحر.

معرفش مين اللي عملي العمل بس ده كان عايز يموتني مش بس يأذيني وماما ساعدتني وفكيناه وبقيت أحسن.

لما خدت لقب ملكة جمال مصر وأنا عندي 25 سنة كنت مهتمة بكل تفصيلة في شكلي ووشي وجسمي، لكن السنتين اللي فاتت خدت ثقة في نفسي رهيبة وبحمد ربنا واللي مش عاجبه حاجة فيا ميبصليش.

أنا راضية حاليًا بشكلي وباللي أنا فيه ولا أهتم بتعليقات الناس، ولو فيه يوم من الأيام هيحصلي نصيب وارتبط هيحب الشخص حورية بطريقتها مش عشان شكلها بس.