أبرز نصائح ياسمين عز للنساء والرجال للعيش في هدوء وسلام

ياسمين عز تصدر اسمها التريند بمؤشر البحث الأشهر جوجل ومواقع التواصل الاجتماعي المختلفة، بسبب تصريحاتها ونصائحها للشباب والبنات.

نصائح ياسمين عز

نصائح ياسمين عز يرصدها موقع قناة صدى البلد في السطور التالية:

• وأنت بتطلب دليفري تسيب فلوس بسيطة .. أنا برجو من حضراتكم إن اللي جاي يوصلك طلب دا جايلك مخصوص عشان تتصدق عليه فطلع مما تنفق له.
• حارس العمارة بيسهر على راحتك ده غير وحدتهم وغربتهم.. وأنت داخل وخارج قوله كلمة حلوة، ومفيش حاجة لو المدام عملت شوية أكل سخن يهونوا عليه.

نصائح ياسمين عز للسيدات

• بلاش تتريقي على مشية جوزك ورجليه فيه ناس بتموت في التراب اللي تحته، والراجل معندوش بوز عشان يلويه وكلنا عارفين مين اللي عنده بوز.
• مينفعش تعملي نفسك فاهمة أكتر منه.. ومتسأليهوش عن الطريق وانتوا ماشيين هو معاه بوصلة رباني.
• لو إنتي قاعدة جنب جوزك متتنفسيش وهو بيتنفس ولو قاعدين بتتكلموا مينفعش تقومي تروحي الحمام بدون ما تستأذنيه .. الحمام مش أهم منه!!.
• لما يكون متعصب وصوت نفسه عالي من العصبية متتنفسيش إنت كما وتنفخي بصوت عالي معاه، ده هيزود شحنة السلبية والنكد وهتقوم خناقة.
• لو إنتو قاعدين مع بعض بتتسامروا وتتكلموا، مينفعش فجأة تقومي في نص كلامه وتمشي بدون استئذان تروحي الحمام، الحمام مش أهم منه يا مدام.. ممكن تستنيه لما يخلص كلامه، ويقوم هو الأول وبعدين تقومي وراه، أو لو إنت مستعجلة تقولي بلطف من غير ما تقطعي كلامه حبيبي هروح أعمل حاجة.
• مينفعش تتكلمي مع الجرسون في وجود جوزك ولو معزومين بره ونسي محفظته لازم تحاسبي بالطريقة دي عشان تحافظي على صورته قدام الناس!!.
• على الست أن تحب تراب رجل زوجها وتقول له حاضر 365 يوم.
• بلاش تنكدي على جوزك عشان متبقيش ملعونة، وحبي تراب رجله وقوليله حاضر 365 يوم، وبوسي راس جوزك ومتنتظريش هدية لأن فرعونك الجائزة الكبرى.
• سيبي مسافة بينك وبين جوزك عشان متدوسيش على ضله، لأن علميًا ممكن يتوجع ويتأثر نفسيًا، وبصيله بـ نظرة المثلث المقلوب من تحت لفوق بـ رقة ودلال ودي عكس نظرة المثلث العادي اللي بنعملها لما بنتضايق من شخص.
• الراجل هو تاج راسنا ومنبع العسل والسكر وتراب رجله بالدنيا، وتعبان وشقيان طول السنة وبيجيب هدايا بدون مناسبة.
• الراجل عنده قلبين واحد في صدره والتاني في رجله الخلفية، ومتراجعيش ورايا ولو عايزة تتأكدي أسألي دكاترة القلب، يعني حفنة التراب اللي بيمشي عليها دي هدية من قلبه ورجله.

ياسمين عز

نصائح ياسمين عز للرجال

• إياك تضعف وتتراجع وتخلي كلمة خطيبتك تمشي عليك وخليها تزعل يوم أو يومين، وقتها هتعرف إنها مخطوبة لراجل عند كلمته.
• يا فرعون يا تاج الراس يا فرحة حزننا ونعمة ربنا، فرعونا مفيش منه، وحفنة من تراب الراجل بالدنيا، جيب لمراتك حفنة تراب من تحت رجلك في منديل حرير، ولو تعرف قيمتك هتعرف قيمة التراب اللي ماشي عليه، لو هي جعفر هترمي الهدية وده اختبار وسقطت فيه.

ياسمين عز ورجال المحافظات

• الست اللي تتجوز من دمياطي ست محظوظة عشان ربنا كرمها براجل حتة سكرة، وذهنه دايمًا حاضر وإفيهاته جاهزة، وقادر يخرج زوجته من أي مود وحش.. الدمياطي ملوش في اللف والدوران ومستحيل يكذب أو يحور عليكي، ولو في يوم حس إنه غلطان في حقك معندوش أي حرج يعتذر ويطيب خاطرك.
• والراجل الدمياطي دايمًا يحسس مراته إنها ست خارقة ومهمة جدًا دايمًا يفخم ويعظم فيها بمناسة وبدون مناسبة، مجرد ما تسلقي بيضتين أو تحمري شوية بطاطس لجوزك الدمياطي، هيقول فيكي قصائد شعر ولا كإنه بيفطر في أوتيل 5 نجوم.
• لو إنتي سايقة العربية وهو قاعد جنبك، في كل ملف أو مطب تلبسيه هيحسسك إعجابه بسواقتك، وأجمل وأهم ميزة إنه مخلص وعينه مش زايغة.
• الزوج الدمياطي يعتمد عليه ومعروف إنه كسيب، تلاقي معاه شهادة عليا ورغم كده ممكن يتعلم صنعة للزمن، وتلاقيه الصبح مهندس وبالليل استورجي، أو الصبح موظف بنك وبليل أسطى نقاشة، إيده عمرها ما تبقى بطالة ومكفي طلبات بيته كلها بيعرف يقيم الناس كويس، لأنه طول وجوده في الورشة بيشوف ناس كتير، وده معناه إنك تقدري تاخدي رأيه في أي موضوع وإنت واثقة من صحة تقييمه.
• الزوج المنوفي يا هناكي ويا سعدك لو إتجوزتي راجل من المنوفية، راجل عاقل ورزين مش أي واحدة تعجبه أو تملا دماغه، وخليكي عارفة إن زواجك من المنوفي إنجاز في حد ذاته لأنه أخذ قراره بعد أيام طويلة من التفكير والتمحيص والدراسات والمباحثات.
• لحد ما توصل إنك الست اللي تستحق يكمل حياته معاها، ومعروف للجميع إن المنوفية بلد الكرم كله، وهتلاقي جوزك المنوفي كريم معاكي ومعطاء، وكل اللي في جيبه ليكي ولولادك، واعرفيها قاعدة المنوفي لا يلوفي مع صفة البخل، ومقولة الراجل هو اللي بينور الست مقصود بيها الرجل المنوفي لأنه بينور الست ويخليها تشع وتشعشع، راجل قلبه كبير وعقله يوزن بلد، ويفهمك من غير ما تتكلمي.
• لو كل الرجالة مع المنوفي في كيس، هتخاري المنوفي عريس، ومن سرس الليان لمنوف المنوفي الجدع تطلعيه من وسط ألوف ومن أشمون لشبين راجل عاقل ورزين، ومن الشهدا للباجور مخه كبير ويعرف يوزن الأمور، ومن قويسنا لتلا يا هلا بالمنوفي يا هلا.

ياسمين عز

ياسمين عز

عيب.. ياسمين عز تنتقد فنانة مغربية شهيرة بعد تقليدها

حاتم فهمي داعما ياسمين عز: أنا مش عارف الستات زعلانين منها ليه؟

ياسمين عز عن أغنية شهر رمضان افرحوا يا بنات: الراجل فرحان علطول

ياسمين عز: «ليه الواحدة بتخبي حملها على سلفتها وتقولها عندي انتفاخ؟» ياسمين عز تعلق على تغير العروسة قبل وبعد الإرتباط مع حماتها