تحدث الفنان جاد شويري عن مفاجآت ألبومه الجديد، والذي يضم 16 أغنية، وعلق على وصفه بالفنان الجريء دائمًا.
قال جاد شويري في لقائه مع الإعلامية شيرين سليمان ببرنامج سبوت لايت المذاع على قناة صدى البلد: «16 أغنية منهم 6 أغاني قديمة متجددين، و3 هم المفضلين عندي لم أشارك بهم لا كاتب ولا ملحن».
وتابع: «مش هاخد أغنية إلا لو حسيت حاجة أنا مش قادر أعملها أو معرفش أعملها أو مختلفة، غير أن الجيل اختلف وطريقة الراب أو الأفكار أو الإفيهات في الأغاني أو مهرجانات، في حاجات كده كانت قريبة من المهرجانات يعني اللي أنا كنت عاملها وفيها حكي، وحاسس الأغاني القديمة دلوقتي أكتر، حسيت أنا لو عدتها بروح 2026 ممكن توصل لجيل ما يعرفهاش».
واستكمل جاد شويري: «زمان قبل عصر السوشيال ميديا إحنا كنا فاهمين فكرة التريند كان جديد كان ممكن واحد يعدي في أغنية أو في أغنيتين.. دلوقتي ده بقى يحصل بطريقة مفصلة أكتر على السوشيال ميديا، وميلودي لما قفلت، كانت المنصة الوحيدة أو التلفزيون الوحيد اللي أنا كنت ماضي معاه حصريًا، فلما قفلت كأن أنا عندي 10 مليون متابع وقفلوا في يوم واحد، وكانت جت الثورة في مصر فأنا شوية ركزت في لبنان بس كتر خير الله الناس تابعتني وبتتابعني على السوشيال ميديا».
وفيما يخص سبب اختيار أسماء جريئة لأغانيه مثل «بلبلة، وطب طز»، علق قائلًا: «حسيت إنها مثل تكريس أو احتفال بشخصيتي المتمردة بالعشرين سنة اللي أنا موجود بيها وببداياتي، لكن اللي هتسمعيه بعد أول 3 أغاني هتسمعي حاجات مختلفة أوي».
وأضاف جاد شويري: «حاجتي القديمة شبه الوقت ده أكتر، فعشان كده أنا اللي واخد المبادرة إن أجددها، وفي ناس كده جددت حاجات بطريقة حلوة أوي، خدت بالي منها زي زيد خالد، والناس بتتعلق بالصبغة الأولى عن أي حاجة، يعني أخدت 10 سنين أجرب أشيل شوية الصبغة وهي لسه عليا، وأنا عندي أكتر من وجه، وكشخصيتي متمرد، جريء، جريء بآرائي المنفتحة زي بآرائي الإنسانية زي بالآراء اللي محدش بيقولها».
وقال أيضا: «أقول رأيي السياسي، رأيي الاجتماعي، رأيي إن أنا حتى قابل أغير رأيي، معنديش مشكلة.. ممكن نتهاجم بس أكذب أفضل؟.. الناس بتفضل كده أسهل، تكذبي أو ماتقوليش يعني، أنا بحاول أكون قد ما فيي حقيقي بجرأتي، وبفني هي مش جرأة بس، خصوصًا لما بكون بشتغل مع فنانين تانيين بفكر أنا ممكن أقدمهم إزاي بأحلى حاجة لايقة عليهم، أنا بلاقي من أحلى حاجات فيا حتى كفنان هي جرأتي».
