أحمد السعدني يكشف أسراره: «بكره عيد ميلادي وأبويا وداني لدكتور نفسي»

كشف الفنان أحمد السعدني أسرار من حياته الشخصية لأول مرة، وتحدث عن تأثير شهرة والده الفنان الراحل صلاح السعدني عليه.

قال أحمد السعدني عبر تصريحات تلفزيونية: «كنت بحب واحدة جدًا، ومكنتش عارف أتجاوز الموضوع، عشان كده رُحت لطبيب نفسي وأنا عندي 16 سنة مرة وماساعدنيش».

أسرار أحمد السعدني

وتابع: «استمديت الفكرة من إن وأنا أصغر أبويا وداني لدكتور ولما رُحت له انبسطت، فاتعلمت إني من وأنا صغير أطلب المساعدة من حد متخصص لو حاجة مش قادر عليها مش عيب خالص».

واستكمل أحمد السعدني: «أنا بكره يوم عيد ميلادي الساعة 12 بالليل بقفل التليفون وأختفي، عشان وأنا عندي 7 أو 8 سنين طلبت أعمل عيد ميلادي في البيت في شهر يوليو كانت إجازة المدرسة وأغلب العيال مسافرين، والعيد ميلاد بدأ الساعة 6، ولحد الساعة 8 مجاش غير 2، لدرجة إني نزلت في الشارع استنى الناس تيجي وفي الآخر جه 3، فاتضايقت جدًا ومن بعدها قررت معملش عيد ميلاد تاني».

تصريحات أحمد السعدني عن طفولته

وقال أيضًا عن طفولته: «نفسية الطفل غريبة جدًا، والمشكلة بتفضل ماشية معاك بقية عمرك، مثلاً أنا بكره يوم عيد ميلادي».

واختتم أحمد السعدني: «شهرة أبويا كانت مضايقاني وأنا صغير جدًا، وبخاف على أولادي من ده، بس معرفش هل هما حاسين باللي كنت حاسس بيه ولا لا، أنا شخصيًا لما كنت بلعب تحت البيت أو في المدرسة، ألاقي واحد من بعيد يقول لي يا ابن الممثل، اللي هو عاوز إيه يعني، فمن وأنا صغير مبحبش فكرة الشهرة، أبويا رجل مثقف جدًا وشخص جميل، ويقول كلام مكنتش فاهم منه حاجة، لكن لما بدأت أكبر وأعدي الثلاثين بدأت أفهم أكتر وأحبه أكتر».