أحمد دويدار: الشيبي أسلوب لعبه زي وليد سليمان.. لكنه غير مؤذي

يرى أحمد دويدار، نجم الزمالك السابق، أن محمد الشيبي أسلوب لعبه مثل أسلوب وليد سليمان، لاعب الأهلي السابق، لكنه غير مؤذي، مؤكدا أن هتافات جماهير الزمالك الأخيرة للشيبي في مباراة الزمالك وبيراميدز أغضبته.

دار جدال قوي بين الإعلامي هاني حتحوت وأحمد دويدار عبر برنامج «الماتش» على قناة «صدى البلد» وجه فيه هاني حتحوت أسئلة لـ دويدار جاءت على النحو التالي:

هاني حتحوت: معايا دقيقتين.. عايز أسألك على 3 حاجات في الدقيقتين دول

النقطة الأولى: ايه رأيك في هتافات جمهور الزمالك إمبارح لـ محمد الشيبي؟ «راجل يا شيبي إللي هتفوها على مدار المباراة، في مواجهة الزمالك وبيراميدز».

أحمد دويدار: لا غلط.. أنا أتضايقت، وإحنا مالنا، الشيبي أحسن لاعب في مصر مش بس محترف، وخدها على مسئوليتي.

أضاف دويدار:' أخلاقيا؟ الشيبي عمل ايه؟ ماتحكمش على رد فعله وواحد ضربه بالقلم واتوقف ماتشين، الشيبي أسلوب لعبه زي وليد سليمان، هو مش لاعب مؤذي، هو أسلوب لعبه غشيم، في لعيبة كويسة جدا بتدخل راجل على كل كورة'.

أوضح دويدار:' لكن لما تيجي على حتة الإيذاء لـ حسين الشحات.. ده رد فعل ورد فعل غلط، لكن لازم كنتوا تعاقبوا من الأول حسين الشحات علشان ما توصلشي الشيبي للي حصل فيه في الماتش'.

هاني حتحوت: النقطة الأخيرة .. ايه رأيك في إعلان الراعي الجديد «المياه الغازية» إللي رفضها جمهور الزمالك؟ ايه رأيك في تحرك الإدارة؟ تعاقدت مع راعي يرفضه جمهور الزمالك، كان الأهلي تعاقد معه قبل كده، وكان جمهور الزمالك بيرفض الراعي ده؟.

أحمد دويدار: خلينا متفقين إن أي شركة موجودة في الكرة في مصر لازم أدور هي مشغلة كام واحد مصري؟ وانت مش مطالب تكون قاعد على الفيسبوك تقول لا وغلط وفي ناس شغالة ممكن تمشي من شغلها.