أحمد زاهر يرد على انتقادات دوره في «سيد الناس»: تدمير للنجاح

رد الفنان أحمد زاهر على انتقادات أدائه في مسلسل سيد الناس، الذي يشارك به ضمن موسم مسلسلات رمضان 2025.

قال أحمد زاهر عبر تصريحات تلفزيونية: «مليش دعوة بكلام بعض الناس هي بالنسبة ليا شخصية جديدة.. اه شريرة وأنا عملت شر قبل كده أكتر من مرة».

تصريحات أحمد زاهر

واستكمل: «وكل شرير لهه تفاصيله وطريقته وانفعالاته، ودي لجان وناس بتدفع فلوس عشان تشتم في زمايلها أنا مليش علاقة بالموضوع ده».

وأضاف أحمد زاهر: «نفسي يبتكروا يعملوا أكونت حقيقي لكن أغلبها مزيف لمجرد تدمير النجاح فقط لا غير وطبعًا كلنا عارفين مين اللي وراها وأنا مش هتكلم في ده لأنه لا يعنيني».

 أحمد زاهر مسلسل سيد الناس

وفيما يخص حقيقة الأنباء المنتشرة عن سيطرة المخرج محمد سامي على الممثلين وطريقة أدائهم، علق قائلًا: «محمد سامي بيسيطر على الممثلين اللي معاه ما طبعًا أومال يسيبهم كل واحد يعمل اللي هو عايزة والدنيا تبوظ!».

وتابع أحمد زاهر: «المخرج القوي وأي مخرج لازم يسيطر على الممثلين اللي معاه ويوجههم بشكل أو برؤية هو شايفها وإحنا كممثلين بنسمع الكلام لكن ده مش معناه أن إحنا روبوت، وشخصية الجباس إنسان معقد فإنه يتفضح قدام المنطقة كلها بالشكل ده محمد سامي قالي مشهد ضربي لبنتي لازم يتصدق متقوليش دي بنتي وهطبطب عليها، لازم يبقى حقيقي وواقعيين، الضرب كله كان بجد مكنش فيه أي تمثيل على الإطلاق».

واختتم حديثه عن كواليس مشهد ضربه لابنته: «وأنا داخل أصور المشهد كنت بترعش وخايف أنا عمري في حياتي ما مديت إيدي على بنت من بناتي، لكن لما اتقال أكشن تحولت لفاروق الجباس ونسيت أن اللي قدامي بنتي وضربتها بجد، وقف التصوير نافورة عياط مني ومنها وحضنتها وقعدت أطبطب عليها وكان موضوع مؤثر جدًا وفجأة قالوا نصور المشهد من زاوية تانية اعترضت في الأول لكن قالوا مينفعش، عشان أعيد مرة تاني بنفس الضرب والأداء كنت بموت من جوا، وهي ضهرها كله كان معلم أزرق وقعدت 3 أيام مش قادر أبص لها وكنت مش قادر أتخيل أني مديت إيدي عليها».

ملك أحمد زاهر