أحمد زعيم: بدأت حياتي محاسب ووالدتي خافت عليا من الفن

كشف الفنان أحمد زعيم كواليس أغنية بدعي عليك، موضحًا أنه غناها عام 2018 ولكنها ظهرت مؤخرًا بعد إعادة توزيعها.

وقال أحمد زعيم عن بداياته: «بدأت حياتي محاسب، ووالدتي كانت بتحاول تقنعني أسيب الفن، وأركز في أكل عيشي عشان خايفة عليا، ووالدتي توفت قبل شهرتي، لما كان عندي تخت موسيقي بسيط في دمنهور، ووالدي كانت دايرة علاقاته موظفين».

بدايات أحمد زعيم

واستكمل: «ومكنش فاهم إزاي ممكن أفتح بيتي من المزيكا، لأنه واخد على فكرة الشغل وقبض المرتب آخر الشهر، كل خوف وقلق والدي راحوا لما شاف خطوات نجاحي، وبقى فرحان بيا جدًا، وأنا ورثت مزيج من الصفات من والدي اللي كان موظف، وبيصحى بدري وينزل يسعى عشان أكل عيشه، وأمي اللي كانت ربة منزل بسيطة وحياتها هادية، وأخدت منهم خفة الدم وحب النكت».

وأضاف أحمد زعيم: «من أهم نصايح والدي إني أعيش اللحظة، وما أشغلش بالي باللي فات ولا اللي جاي، وغرس فيا مقولة (ما بين طرفة عين وانتباهتها يغير الله من حالٍ لحال)».

مشوار أحمد زعيم الفني

وتابع: «على مدار مشواري الفني حصل تطور كبير، من شغلي كملحن بيجرب ألحان، وبجرب صوتي على الألحان اللي بيغنيها غيري، ومع كل ستايل أغنية ولحن بحس إن فيه تغير في صوتي، وده حصل مثلًا في أغنيتين (يا عراف) و(حب تاني)، وفضلت أشتغل على صوتي وركزت لحد ما بقى له شخصية واضحة ومميزة».

واختتم أحمد زعيم: «بعتبر نفسي شخصية حرة، لا تحب أن يقودها أحد، أو يفرض عليها أي قرار، وفي المقابل أنا شخص بطيء في قراراته حاليًا بعد أن أخذت دروس كثيرة من التسرع زمان.. أكتر وقت حسيت فيه بالوحدة بعد وفاة أمي، ومش بحب الوحدة بطبعي، لكن من وقت للتاني الإنسان بيحتاج للعزلة والهدوء لإعادة ترتيب أوراقه، وكنت دائم التوتر والقلق زمان بطبعي، لحد ما اتعلمت التفاؤل مع الوقت بقربي من ربنا، وإيماني بقدره خيره وشره، وبدون إيمان مفيش طمأنينة، وأي إنسان لازم يعود نفسه على التفاؤل لحد ما قدره يتغير للأحسن».