أحمد عزمي: كنت بخاف أنام مصحاش من الزعل وابني بيحس بيا وأنا مش معايا فلوس

أعرب الفنان أحمد عزمي عن استيائه من غيابه عن الوسط الفني، بسبب استبعاده من الترشيحات للأعمال الفنية.

كشف أحمد عزمي سبب غيابه عن الساحة الفنية، وأوضح أن الأعمال التي قدمها مؤخرًا كانت خارج مصر، مضيفًا: «ابني آدم هو الدافع الأساسي لتحركي ومناشدتي للقائمين على الصناعة لدعمي في الترشيحات الفنية لأكون قدوة حسنة له، ويشعر بالسعادة عندما يلقى الحب والتقدير من الناس في أي مكان.

سبب غياب أحمد عزمي عن الساحة الفنية

وقال عبر تصريحات تلفزيونية: «المستشار الإعلامي للشركة المتحدة كلمني وأخبرني بموعد مقابلتي مع الرئيس التنفيذي للشركة المتحدة عمرو الفقي، وأول ما قالي كدا عيني دمعت كتير، وبعدها قالي سامعني رديت عليه الحمدلله وحسيت بسعادة كبيرة أوي، ولما قابلت عمرو الفقي قالي ماتزعلش مننا».

واستكمل أحمد عزمي: «وحسيت أني أعرفه من زمان، وقالي حمدلله على السلامة ومكانك موجود وأنت دخلت الشركة المتحدة وهنبدأ صفحة جديده، وبقيت في حضننا»، لافتًا إلى أنه تفاجأ بعقدًا للمشاركة في مسلسل ضمن دراما رمضان 2025.

وأضاف: «آدم ابني لما كنا بنخرج وأنا مش معايا فلوس كان بيحس بيا وكان ممكن ناكل كشري ونشرب كوباية شاي، ونروح وتفاجأت أما قالي أنت كاتب كلام من ذهب على فيسبوك»، مشيرًا إلى أنه في إحدى الفترات كان آدم نجله بعيدًا عنه لمدة 3 سنين حيث كان مع والدته فترة الانفصال.

أحمد عزمي

علاقة أحمد عزمي بوالدته الراحلة

وفيما يخص علاقته بوالدته الراحلة، أوضح أنها سبب تعليمه سورة ياسين وحبه لها، مؤكدًا حرصه خلال الأيام الأخيرة على قراءة السور القرآنية والصلاة والدعاء لوالدته.

واستكمل: «أمي كانت وردة وكانت تحب الخروج، ولكن مع خروجي من السجن قابلتني أختي الكبيرة وقالت لي عايزاك تدخل بس ما تتخضش، ولما دخلت شفتها تعبانة جدًا من كتر الزعل مسكت نفسي بالعافية، وهي كان عندها اعتراض على حاجة أنا بعملها، وقررت بعدها إني ماشربش تاني، ومرت 6 شهور وكلمتني أختي قالتلي أمي مش معانا فلازم تيجي لأنها في الأيام الأخيرة، ولما رحت وقلت لها ازيك يا أمي قالتلي أنت بقت كده (إشارة بالإصبع على أنه جيد) رغم أنها لم تتحدث وبعد نصف ساعة توفيت».

وتابع: «بعد نشر بوست الاستغاثة على مواقع التواصل الاجتماعي وردود الأفعال عليه، وجدت نفسي أتحدث إليها وكأنها ما زالت موجودة، وكنت أشعر بالتعب وكأنها تحتضنني وتهدئني، وفي فترة كنت بخاف أدخل أنام مصحاش من كتر الخنقة والزعل وأنا لوحدي، و بتمنى أكون مع ابني في المدرسة ودلوقتي أما رجعلي أنا اللي بذاكر له عربي ودين، وهو دلوقتي بيلعب سباحة وعمري ما فرضت عليه حاجة».

خلاف أحمد عزمي ووحيد حامد

وأشار إلى أن السيناريست الراحل وحيد حامد طلب لقائه بعد خروجه من السجن بشهرين، وعندما التقاه قال له وحيد حامد: «أنا بس كنت عايز أتأكد إنك لسه كويس وشكلك زي ما أنت لأني سمعت حاجات»، لافتًا إلى أنه طلب منه الانضمام لمسلسل الجماعة 2 وتحدث مع الشركة لصرف 20% من التعاقد، وظل على تواصل معه وحضر عزاء والده ووالدته.

وتايع أحمد عزمي: «موقف كان حصل بس الحمد لله تم الصلح فيه وأستاذ وحيد حامد لسه عايش، حصل خلاف بيني وبينه في فيلم دم الغزال، أنا كنت مضيت الفيلم بعد ما عملت معاه مسلسل الدم والنار، بعتلي وإداني السيناريو ومضيت، المنتج الفني للفيلم كان مش بيحبني وكان بيرزل عليا هو عمل معايا حركة عارف أنها بتستفزني، أولا هو ضغط عليا في التعاقد ومضيت وبعدها بـ 5 أيام لقيته بيكلمني بيقولي انزلي فورا وقالي: حد الظاهر قال لأستاذ وحيد حامد حاجة وإحنا قررنا إن الأجر هينزل للربع، فقلت له لأ من الأول تقولي لأني إني أمضي على رقم وأنزل الربع نفسيا هبقى تعبان وأنا بشتغل».

وأضاف: «بعدها راح لأستاذ وحيد حامد وقاله كلام تاني خالص وقاله: الواد بيتنطط علينا وبيقول إنتوا مش عارفين أنا مين أنا أحمد زكي التاني، أستاذ وحيد غضب وشالني من الفيلم، أنا فكرة أني معملش الفيلم كارثة لكن الكارثة الأكبر خسارتي لأستاذ وحيد، قعدت مكتئب فترة طويلة قعدت سنة مش عارف أكلمه ولا أروح ليه، لحد ما في يوم لقيت التليفون بيرن الأستاذ وحيد حامد، قالي جملتين: بص يا أحمد أنا عرفت اللي حصل بالظبط وعرفت الحقيقة وهننسى كل اللي حصل وأنا عايزك في فيلم اسمه الوعد تعلالي، روحت له وأنا حاسس إني طاير وحضتنه وقلت له أن كل اللي حصل اتفهم غلط، وأن الشخص دا كان عايز يوقعني في ناس تانية وأستاذ محمد ياسين كان موجود وقاله دا اللي حصل، عملت فيلم الوعد وبعدها الجماعة».

كما قال أحمد عزمي عن علاقته بالفنان يحيى الفخراني: «فوجئت بمكالمة مع الأستاذ مجدي الهواري في أول سنة بعد الخروج من السجن، وكانت وقتها تُنفذ مسرحية الملك لير وتفاجأت بسؤال الفنان يحيى الفخراني عني في أول بروفة للمسرحية، وطلب مني المشاركة في المسرحية، وبالفعل حدثت مكالمة مع الهواري والتقيت الفنان الكبير يحيى الفخراني وأسدى لي نصائح مهمة للرجوع أقوى.

واختتم حديثه قائلًا: «كان بسبب أمر عاطفي وكنت صغير جدًا، وكنت مخنوق ترك حبيبتي لي، وهو ماكنش انتحار بالمعنى المعروفة لكن حركة للفت النظر لرجوعها لي مرة أخرى».

أحمد عزمي

أحمد عزمي