أحمد موسى ينفعل: بنهاجم المنتخب وحسام وصلاح ليه؟.. احنا كسبنا إدعم منتخبك

شن الإعلامي أحمد موسى، هجومًا لاذعًا على بعض مقدمي البرامج والنقاد والمحللين الذين انتقدوا منتخب مصر وحسام حسن ومحمد صلاح بعد التأهل لثمن نهائي أمم أفريقيا على حساب بنين.

وتابع خلال تقديم برنامج على مسئوليتي، المذاع على قناة صدى البلد: هو ده إعلام ولا تشويه لكل حاجة إيجابية تحدث بما فيها الكورة، ياخي أدي جرعة إيجابية كويسة وشجع الناس وشد من أذرهم.

المنتخب مضغوط مش محتاج انتقاد على الفاضي، زمان أيام كيروش كنا نقول مش مهم الأداء المهم النتيجة، ودلوقتي العكس، طيب افترض لعبنا حلو وخرجنا يبقى يا فرحتي على كده.

واستكمل: هو لازم نبهدل محمد صلاح وحسام حسن، يا جماعة دلوقتي لازم نحافظ على المنتخب، يعني انت عامل برنامج عشان ليل ونهار تنتقد، أدوا الفرصة لرجالتنا وساعدوهم وترجموا كلام محمد صلاح بشكل غلط على مزاجهم.

وأردف الإعلامي أحمد موسى: ما تدعم صلاح يا سيدي متدايق أن منتخب بلدك تأهل لدور الـ 8، العالم كله بيحتفل بمحمد صلاح إلا إحنا بننتقد ومش عاجبنا.

واختتم: المطلوب نساعد المنتخب مش نجلده، وبزعل والله لما ألاقي ناس فاضية، مش لاقية حاجة تعملها بعد ما سجلنا 3 أهداف ومستكترين الاحتفال على حسام حسن بعد الفوز، معلقا: ليه يا حبيبي حضرتك استنى ناخد البطولة وانتقد براحتك بعدها ولما يخطئ حسام حسن نحاسبه.