أسامة الهادي عن مسلسل وبينا ميعاد: شخصية طاهر مستفزة

ياسمين حمادة 07 فبراير 2023 | 08:43 مساءً

تحدث الفنان أسامة الهادي عن نجاح مسلسل وبينا ميعاد، متمنيًا تقديم جزء ثاني من العمل، قائلًا: «المخرج هاني كمال كان عنده ثقة فيا من أول يوم عشان أفهم المطلوب وأنفذ الورق بشكل كويس».

أسامة الهادي مسلسل وبينا ميعاد

قال الفنان الشاب أسامة الهادي في تصريحات تلفزيونية له: «أدّعي أني نفذت الحاجة دي، وهو دايمًا كان بيديني طاقة ثقة، وقال لي دي فرصة كبيرة جدًا وخلي بالك كان عاوز يفهمني إحنا داخلين على إيه».

واستكمل أسامة الهادي حديثه عن المخرج هاني كمال قائلًا: «أنا بحب أبدي وجهة نظري ويتسمع ليها في السيناريو، وممكن يطلع فكرتين مناسبتين، والأستاذ هاني كمال إداني المساحة دي، وده مش اسمه تدخل لكن هذا يعني أننا منفتحين على الفكرة».

ميران عبدالوارث وأسامة الهادي

تصريحات أسامة الهادي

وتابع: «المخرج هاني كمال بيحب يسمع للناس اللي عندهم خبرات سابقة مشابهة للدور المكتوب، أنا أول حاجة شدتني في العمل إن الورق غني جدًا بعيدًا عن شخصية طاهر، والأستاذ هاني كمال المؤلف أرسل لي في البداية 7 حلقات ثم كلمته وقلت له أنا عايز أعرف باقي الأحداث دلوقتي».

وقال أسامة الهادي أيضًا عن مشاركته في مسلسل وبينا ميعاد: «القصة كانت عظيمة، وفي شخصيتي شدني إن طاهر بيغني وموسيقي وكان تحدي رائع بالنسبة لي، وكان عندي المراهنة أنني أستمتع بالشخصية وفيه حاجات صغيرة مني، وأنا شخص متفهم ولذيذ ومش بزعق».

غناء أسامة الهادي

وأضاف خلال تصريحاته التلفزيونية: «وأنا بقرأ الورق شعرت أن طاهر شخصية مستفزة، وهي تشبه بعض الصفات في شقيقي، وأنا بحب أخذ الحاجات من الحقيقة حتى أنني قلت له تعالى من المنصورة حيث تعيش عائلتي، لكي يظل بجانبي في القاهرة وأستمد منه الصفات التي أظهرتها في المسلسل».

وفيما يخص بداياته بمجال الغناء، علق قائلًا: «أنا بحب المزيكا أوي من صغري واكتشفت أني عايز اتعلم دا ولعبت جيتار، بعد كدا قولت عايز أمتهن التلحين، وقريبي المؤلف والشاعر هاني سرحان فهمني القصة وبدأت ألحن وأتدرب وحبيت الموضوع».

واستطرد: «مكنتش عايز أغني وعرفت أن نقطة قوتي عشان بحب الأغاني بعرف أعمل أغنية جيدة، واشتغلت على نفسي وحاولت أكون بعرف أغني كويس وأعمل أغاني شبهي وخاصة بيا وعملت فرقة، وبدأت أصور الأغاني واتعلمت المونتاج علشان أطلع المنتج الخاص بيا، وممتن للتجارب اللي خليتني أتعلم حاجات خارج السياق اللي كنت فيه وقتها».

أسامة الهادي

بدايات أسامة الهادي

كان حلم أسامة الهادي في بداياته أن يقدم حفلة في ساقية الصاوي، معلقًا: «وبالفعل هذه الحفلة كان فيه بنت بحبها في الجامعة وأجرت أتوبيس للساقية، لكن شخص كلمني عشان أوديشن إعلان روحت بسرعة وغنيت ومشيت عشان ألحق الحفلة وكانت حفلة رائعة».

واختتم قائلًا: «بعد الحفلة كلموني مرة ثانية عشان أسجل الإعلان وتم طرحه في 2012 وكان فاتحة خير عليّ بحس إني مخلوق لهذه المهنة وأعرف أؤثر بها وأنا مبسوط، وأقدر أعمل أغنية سعيدة وحزينة وحاجات تعبر عني».

أسامة الهادي