أكرم حسني عن كواليس أغنية تيجي نسيب: اتعملت في 5 ساعات واستهلكت نص كيلو بن

كشف الفنان أكرم حسني كواليس كتابة أغنية تيجي نسيب وتلحينها قبل 3 سنوات، حتى قدمتها الفنانة أنغام في ألبومها الجديد.

كتب أكرم حسني في تعليقه على فيديو نشره للملحن إيهاب عبد الواحد وهو يغني أغنية تيجي نسيب، عبر حسابه الرسمي بموقع انستجرام، قائلًا: «يوم الثلاثاء 2 نوفمبر 2021 الساعة 4 الفجر: قام إيهاب عبد الواحد عشان يمشي بعد سهرة طويلة عندي في البيت إيهاب مسابش فيها الجيتار من إيده هو بيغني وكلنا بنغني معاه».

كواليس أغنية تيجي نسيب

وأضاف: «بعد ما كله مشي جاتلي فكرة أغنية تيجي نسيب فكتبتها وخلصتها على الساعة 6 الصبح، وهموت وأكلم إيهاب عشان يجيلي يسمعها ويلحنها بس مكسوف أكلمه.. الراجل لسه ماشي من عندي من ساعتين وأكيد ملحقش ينام الساعة 7 صباحًا بعد ما قدرت أمسك نفسي لمدة ساعة كاملة اتصلت بيه.. الساعة 9 إيهاب وصل.. أنا: بوب أنا كتبت أغنية فرحان بيها أوي.. إيهاب: طب مش كنت بتسألني قهوتي إيه؟».

واستكمل أكرم حسني: «أنا (بتجاهل): بص يا بوب الأغنية بتقول: تيجي نسيب.. تيجي نجيبها في النصيب.. تيجي نقول محناش لبعض ويبقي بُعد تغيب وأغيب، إيهاب (باندهاش): مين اللي كاتب الكلام ده؟، قلت له: أنا، فقال لي: أنا قهوتي سادة، من الساعة 9 للساعة 12 إيهاب مبيعملش حاجة غير إنه ماسك الجيتار وعمال يجرب جمل لحنية في دماغه ويطلب قهوة سادة للساعة 12 وعشر دقايق كان خلص اللحن وبيسجله (بصوا الساعة اللي ورا عشان تتأكدوا)».

أنغام وأكرم حسني

أكرم حسني أغنية تيجي نسيب

وتابع: «ومكانش يعرف أني لما قولتله وهو ماشي الفجر عايزين نكررها قريب أنها هتبقي قريب أوي كده، الأغنية راحت للموزع الكبير صاحب اللمسات السحرية حسن الشافعي عشان يحط بصمته عليها وتطلع بالشكل اللي إنتوا سمعتوه.. أغنية تيجي نسيب اتكتبت واتلحنت في خمس ساعات واستهلكت نص كيلو بن وسط محوج».

واختتم أكرم حسني حديثه عن كواليس أغنية تيجي نسيب، قائلًا: «بس عشان طالعة من القلب ولحنها ملحن عبقري بيحس بكل كلمة ويترجمها للحن ربنا كرمنا بأن اللي يغنيها تبقي فنانة معجونة إحساس وفن وحلاوة صوت وحضور طاغي ومكانة كبيرة في قلوب جمهورها في كل حتة في الوطن العربي.. أنغام».

 

View this post on Instagram

 

A post shared by Akram Hosny (@akramhosny)